OLELO

Ka piha makahiki mua o ka Hōkū Ho’olaha

By Na Laiana Wong

POSTED: 01:30 a.m. HST, Jun 11, 2011

Synopsis: This week we mark the first anniversary of the Honolulu Star-Advertiser and are grateful for its continued support of the Hawaiian language column Kauakūkalahale.

Aloha hou mai nō kākou e nā hoa pa’a heluhelu o nēia wahi kolamu ‘ōlelo Hawai’i e puka ana i kēlā me kēia pule no nā makahiki e holo aku nei i ka ‘eiwa. I kēia pule nei ho’i i ho’omana’o ‘ia ai ka piha ‘ana o ho’okahi makahiki o ka nūpepa puka lā hou e kapa ‘ia nei ma ka ‘ōlelo haole ‘o ka Honolulu StarAdvertiser, kahi ho’i i ho’ohui ‘ia ai nā nūpepa puka lā kahiko ‘o ka Honolulu Advertiser a me ka Honolulu Star Bulletin (ka Hōkū Buletina). ‘O ua Hōkū Buletina nei ho’i ka home o Kauakūkalahale mai ka makahiki 2002 a hiki loa mai nō i kēlā makahiki aku nei, i ka wā i hānau ai ‘o kēia nūpepa hou a’u e kapa nei ‘o ka Hōkū Ho’olaha.

A he mea kūpono ko māua (‘o Kekeha Solis kekahi luna ho’oponopono) hā’awi ‘ana aku i ko māua mahalo piha i kahi luna ho’oponopono ‘o Frank Bridgewater no kona ho’oka’awale ‘ana i kauwahi ‘īniha i kēlā makahiki mua no ke kākau ‘ana i nā mana’o like ‘ole ma loko o ka ‘ōlelo kupa o ka ‘āina, ‘o ka ‘ōlelo Hawai’i ho’i. A ua kūpa’a nō ho’i ‘o ia, i loko o kēlā mau makahiki he ‘eiwa i hala, ma ka mālama ‘ana i kēlā ‘aelike mua, kahi i ho’omalu ‘ia ai ua mau ‘īniha nei no ka ‘ōlelo Hawai’i wale nō. Eia ho’i, ‘a’ole wale nō ia kūpa’a ‘ana he wai ‘au’au. Nui nā leo e nonoi ana a koikoi ana ho’i i ka unuhi ‘ia o ka mana’o haole mai loko mai o ia mau kolamu. ‘O kona kūpa’a wale aku nō na’e ia, a ma waho aku o kekahi ‘ōlelo hō’ulu’ulu pōkole ma ka ‘ōlelo haole, he ‘ōlelo Hawai’i wale nō kai ho’opuka ‘ia.

A ke ho’ouna pū aku nei māua i ko māua mahalo nui i nā luna ‘ē a’e o ka nūpepa nāna i kōkua i ka ho’opuka ‘ana i kēia wahi kolamu i kēlā pule kēia pule o ia mau makahiki he nui. ‘A’ohe mea ma waena o lākou i pa’a iā ia ka ‘ōlelo Hawai’i, a no laila, he nui ko lākou hilina’i mai e ho’opuka wale aku nō māua ma nā ‘ōlelo kūpono me ka hō’alo ho’i i nā ‘ano ‘ōlelo kohu ‘ole. Mahalo a nui iā ‘oukou a pau no ka ‘auamo ‘ana i kēia hana me ka ho’oikaika pū nō ho’i i ka ho’ōla ‘ana i ka ‘ōlelo Hawai’i.

I loko o kēia mau lā a kākou e ‘ike nei, ke kupu nei nā ‘ano ‘enehana ho’olaha like ‘ole he nui, ‘o ke kamepiula ‘oe, ‘o ka iPad ‘oe, ‘o ka iPhone ho’i, a lilo kēia mau ‘enehana i wahi e heluhelu ai i ka nūhou. Ke hopohopo nei kekahi po’e o ‘ike ‘ia auane’i ka pau ‘ana o ia mea he nūpepa ma ke ‘ano he ala e laha ai nā mana’o like ‘ole i mua o ke ākea. E ho’omaopopo na’e kākou i ke kupu ‘ana mai o ka lēkiō a me ke kīwī a lilo lāua i wahi e ho’olaha ‘ia ai ka nūhou. Ua mana’o ‘ia ē ‘o ia ka pau ‘ana o ia mea he nūpepa. ‘A’ole na’e pēlā. Ua ola ia mea he nūpepa a ‘o ia ola ‘ana nō ma kēia hope aku a hiki i ka pau ‘ana o kākou ka po’e puni heluhelu. E ola ka Hōkū Ho’olaha, ka mō’ī o nā nūpepa.

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by Kawaihuelani Center for Hawaiian Language at the University of Hawai’i at Mānoa, supported by the Initiative for Achieving Native Hawaiian Academic Excellence.

Ua kāpae ‘ia ka ‘oia’i’o

By Kekeha Solis

POSTED: 01:30 a.m. HST, Jun 04, 2011

Synopsis: Discusses the Ka Makaainana articles on May 7 and 28 and rewriting history.

Aloha mai e nā makamaka heluhelu mai ka puka ‘ana o ka lā i Makanoni, a i kona welo ‘ana i ka mole ‘olu o Lehua. Mahalo no ka ho’onanea ‘ana aku nei i ka mo’olelo ‘ana mai o kekahi mea kākau o ke au i hala. He mo’olelo maika’i loa ia, kahi e ‘ike ‘ia ai ke ‘ano o ka no’ono’o ‘ana o kekahi kupuna (a mau kūpuna paha) no nā hana a lākou i ‘ike ai. ‘A’ole i pa’a ka inoa o ka mea kākau ia’u, akā ‘o ke po’omana’o o ka mo’olelo āna i kākau ai, ‘o ia nō ke po’omana’o e kau a’ela ma luna, a i ho’omaka ua mo’olelo nei i ka lā 24 o Iune o ka makahiki 1895. A penei ka paukū o ka mo’olelo o ia lā.

“Ke manao nei ka mea kakau i keia wahi moolelo e hoopuka aku i kekahi mea oiaio, me ka uhiuhi ole e like me ka mea i oleloia ae ma ke akea e na mikanele, a lakou i ahai aku nei i na hana pekapeka i ke Aupuni o Amerika Huipuia a me kekahi mau aupuni e ae, e helu papa ana i na ino a me ka pelapela o ka lahui Hawaii, mai na kane a na wahine a me ka mea e noho ana ma ka nohoalii. Ua owiliia keia mau mea a pau e ua poe mikanele nei, a o ia ka na komisina o ke Aupuni Kuikawa i ahai aku ai no Wasinetona a ulaaia aku la ilaila.”

A no laila, ke ‘ike a’ela kākou e nā makamaka heluhelu i ke kumu i ulu ai ka mana’o i loko o ka mea kākau, e hō’ike aku i nā mea i hūnā ‘ia iho a i ha’i hewa ‘ia a’e paha e pili ana i ka Lāhui Hawai’i me ka hu’e pū ‘ana aku i ka ‘oia’i’o. E like ho’i paha me nā hana hō’ino i ka Mō’īwahine Lili’uokalani “e olelo ana, he Moiwahine puni koko Oia; he ake e okiia ke poo, o ka poe nana i hookahuli i ke Aupuni Moi, a pela aku” (Na hana hoino i ka Moiwahine, Nupepa Ka Oiaio, Pep 9, 1894). A ma ia mo’olelo nūpepa nō, Na hana hoino i ka Moiwahine, i hu’e ‘ia ai ka ‘oia’i’o, ‘o ia ho’i, he mana’o wale nō ko ka Mō’īwahine, e ho’okō ‘ia ke kānāwai. A ‘o ke kānāwai nō ia a ia po’e kipi i hana ai. ‘O ka mea ‘āpiki, ke heluhelu ‘ia ua mo’olelo nei e ka po’e na’aupō, e kuhi wale ana paha lākou, he mo’olelo wale nō ia e hō’ike ana i kekahi ‘ao’ao, he ‘ano ho’okae ho’i i nā ‘ao’ao ‘ē a’e, a he mau ‘ōlelo makawela wale nō.

Akā, inā i laulā ke ‘ano o ka no’ono’o o ua po’e na’aupō lā, inā ua ‘ike le’a lākou i nā mea he nui hewahewa e ho’okae ana i ke Kanaka Maoli. ‘O ka nui o nā puke mo’olelo, nā ha’awina kula, a pēlā aku, he mea ho’okae nō i ke Kanaka Maoli. Ua pōmaika’i na’e i kekahi mau puke hou i pa’i ‘ia mai nei e nā Kānaka Maoli, a me ke a’o ‘ana mai o kekahi mau kūpuna a me nā mākua paha i nā ‘ike ku’una, a me ka launa pū ‘ana me nā nūpepa ‘ōlelo Hawai’i, kahi i ‘ike ‘ia ai nā ‘oia’i’o i hūnā ‘ia e kekahi po’e kākau puke.

‘Auhea ‘oukou e nā makamaka heluhelu, ‘o ka po’e ho’i i like ka mana’o me ko’u, a me ka po’e e kū’ē nei i ko’u mana’o kekahi, he lumi ka’awale nō ko ke kino lahilahi o Kauakūkalahale, a no laila, e ho’ouna mai nō i nā mo’olelo.

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by Kawaihuelani Center for Hawaiian Language at the University of Hawai’i at Mānoa, supported by the Initiative for Achieving Native Hawaiian Academic Excellence

Mikanele a mika(ho’o)nele

By Kupopou

POSTED: 01:30 a.m. HST, May 28, 2011

Synopsis: Continuation of “Pōmaika’i i nā mikanele?” on May 7, 2011.

I kinohi o ka hiki ana mai o ka Euanelio i Hawaii nei, o Iehova pu no kekahi, a Nana no i hoohuli i ka naau o na alii a me ka lahui e ike Iaia a i Kona mana e ola ai, oia hoi Kona Euanelio. Nolaila, hookuu mai la ke Akua i na poino he nui maluna o keia lahui i na ma’i o kela a me keia ano. O ke kumu mai o keia poino, mamuli no ia o ka haalele ana o na mikanele i ke kahua mua a lakou i hele mai ai. A ke hele mai nei me kekahi kumu o ke ano ino loa, a me ka hoopailua no hoi ke nana aku. No keaha mai? No ka mea, ua haalele i ke aloha, ke ahonui, a me ka hoomanawanui, a ke paulele nei i na mea o keia ao, a e kau ana ka hoopai weliweli o na poe na lakou e alakai hewa nei i ka lahui. O na pomaikai a na makua mikanele a Alapaki e kalele nei, ua hala loa ia mawaho o ke aniani hoonui ike. O ko’u noonoo maoli ma muli o na poino makolukolu i hoaahuia iho maluna o ka lahui holookoa o na Hawaii ponoi o ka aina kulaiwi, ma na rula oolea hookamani a na mikanele i rula ai a e rula nei i ka lahui, pela i ulu mai ai na poino a nui wale.

I mea e maopopo ai i ka mea heluhelu na kumu nui a me ke kahua o keia manao a ka mea kakau e kalele nei maluna o ka oiaio, mai ka pae ana mai o na mikanele a hiki i ka 1878, a mawaena o ia kowa e hoikeia aku ai ka pomaikai a me ka poino o ka lahui ma na hoohana maoli ana a ka papa mikanele, e hoohana ana ma na rula alakai uhane a me na rula alakai o ke aupuni o ke kaihi-ku.

A pau keia, alaila, e hoomaka hou ia aku ana ka moolelo mai ka makahiki 1878, a hiki i ke au o ka hookahuli aupuni o Liliuokalani, a me na hana-kalaiaina o ka noeau ana i lia mua ai no ka pono laula o kona lahui a me na makaainana o na aina e mai e noho ana malalo o ke kanawai, ma ke ano kaulike a kuokoa o kela a me keia mea.

Eia iho ka’u mau huahelu o ka heluna lahui mai ka pae ana mai o na mikanele a hiki mai i keia wa, a me na make mai ko lakou manawa e rula ana ma ke ano pepehikanaka, a e pono e hoomaopopo pono ia, penei:

» Hawaii — 1828, 85,000. 1832, 45,792. 1836, 39,364. 1850, 24,450. 1860, 21,481. 1866, 19,800. 1872, 17,001. 1878, 17,034.

» Maui — 20,000, 35,663, 24,199, 17,514, 16,400, 14,032, 12,334, 12,107.

» Oahu — 20,000, 29,755, 29,800, 19,126, 21,275, 19,799, 20,671, 20,236.

» Kauai — 10,000, 10,977, 8,934, 6,991, 6,487, 6,299, 4,196, 5,634.

» Molokai—3,500, 6,000, 6,000, 3,607, 2,864, 2,299, 2,349, 2,058.

» Lanai—2,500, 1,600, 1,200, 600, 646, 394, 348, 177.

» Niihau—1,000, 1,049, 993, 790, 649, 325, 323, 177.

» Kahoolawe—50, 80.

Huina nui iloko o kela a me keia makahiki: 1828, 142,050; 1832, 130,313; 1836, 108,579; 1850, 73,138; 1860, 69,800; 1866, 62,959; 1872, 56,897; 1878, 57,985.

(‘Auhea ‘oukou e nā makamaka heluhelu, he koena iki a laila, lawa paha no kēia mana’o o ka mea kākau. E ho’omanawanui ‘ia ka ‘ono. Aloha.)

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by Kawaihuelani Center for Hawaiian Language at the University of Hawai’i at Mānoa, supported by the Initiative for Achieving Native Hawaiian Academic Excellence.

KAUAKUKALAHALE

Lilo ‘o Lance Waiokeola Ka’owili i ke kai o Ka’iwi

By Wong Kauakukalahale

POSTED: 01:30 a.m. HST, May 21, 2011

Synopsis: Lance Waiokeola Ka’owili disappeared at Sandy Beach Park.

Aloha e nā luna ho’oponopono o ke kolamu Kauakūkalahale. E ‘olu’olu, e ho’okomo i kēia i ke kolamu i aloha ‘ia e nā kānaka o nēia ao.

He kanaka ‘olu’olu loa ‘o Lance Ka’owili a aloha nui ‘ia ‘o ia e nā kānaka like ‘ole o ka ‘āina. Inā paha i loa’a kahi mea iā ia, a ‘a’ole ho’i i loa’a i kekahi, hā’awi wale ‘o ia nei i ia mea me ka no’ono’o i ka pōmaika’i o ia kanaka. A he mea mau ia hana āna i nā kānaka like ‘ole. Me he mea lā, ‘o kahi Pahia (ka mea nāna ka ‘ōlelo “aia nō i ‘ō”) nā kānaka a pau. No laila, ua hele a kaulana ‘o ia i ka pōmaika’i a me ka ‘olu’olu.

Noho ‘o ia i Hau’ula, eia kā, he mea ma’amau kona holo ‘ana i ke awāwa o Kalama no ka mālama ‘ana i kona makuahine. ‘O ka hapanui o ka manawa ke hele ‘o ia i laila, noho ‘o ia a pō ke ao a ao ka pō. A ma muli o kona pipili a akamai nō ho’i i ke kai, ‘oiai ‘o kāna mea walea a mea nanea ho’i ka lawai’a, ka lu’u kai, ka he’enalu, ke kahanalu, a me ia mea aku, ia mea aku, iho ‘o ia i kai o Ka’iwi (Sandy’s) i nā lā a pau, i ke kakahiaka a me ka ‘auinalā, a lilo wikiwiki ‘o ia i hoaaloha no nā kānaka o ia kahakai. E like me ka ma’amau o ka pā ‘ana mai o ka makani Ho’olua ma laila, pēlā pū ka ‘ike ‘ana i kona kalaka e kū ana ma ua kahakai nei.

‘O ke kakahiaka nui o kahi Pō’ahā i hala akula, ma mua ho’i o ka hō’ea ‘ana mai o nā luna kia’i ola, ka lā hope o ka ‘ike ‘ana o Ha’i i ko Lance maka u’i e kahanalu ana. He lā nalu nui, he au nui, a he makani ikaika ko ia lā. He lā e kau ai ka weli i ka hapanui o nā kānaka noho ‘āina. ‘A’ole pēlā nona. Mino’aka nui me ke komo pū ‘ana iho i ke kai me kona hoa. A li’uli’u, hiki mai ka hola e pae ai no kona hoa, ka mea nāna e nānā ana i ko Lance he’e ‘ana i ka nuku, ho’i ana i ka lala. Pae kona hoa a ha’alele. Ua pō ia ao. I ke ao ‘ana a’e o ka Pō’alima, mau ana nō kona kalaka i kahi like me ka lā ma mua pono, eia kā, he mea ‘ole i nā kānaka kama’āina ma muli o kona holo mau ‘ana i ke kahanalu. A pō ia ao. I ke ao ‘ana ho’i o ka Pō’aono, i nānā aku ka hana, mau ana kona kalaka i kahi like. Ua ‘ano ‘ē kēia, eia kā, ‘a’ole i no’ono’o nui ‘ia. I ke kū ‘ana o ka lā i ka lolo me ka ‘ike ‘ole ‘ia ‘ana o kona maka u’i e nā hoa, ua lilo i mea ho’opāha’oha’o. Wehe ‘ia maila ka puka kalaka, aia ho’i, aia nō kona kalipa, kelepona, kī ka’a, mea’ai i hele a palahū, a me nā mea ‘ē a’e i waiho ‘ole ‘ia i ke ka’a ke hele i kahi ‘ē, koe na’e ka holo ‘ana i ka ‘au’au kai.

‘O ke kāhea ‘ana akula nō ia i kona makuahine me ka nīnau, inā paha i ‘ike ‘ia ‘o ia. Hō’ole ‘ia me ka ‘ōlelo, ua hala ‘elua lā, a ‘a’ole i ‘ike a lohe ‘ia ‘o ia. Ha’i akula i nā luna kia’i ola, a kāhea akula iā 911. Holo maila nā ka’a kinai ahi a me ka pinao huli a loa’a, a ho’omaka e huli iā ia ma ke kai. Ma ia wā like, ho’omaka pū nō kānaka o Ka’iwi e huli kekahi ma o ka lu’u ‘ana i kai, a me ka holo wāwae ‘ana i ka ‘ae kai mai kahi e kahanalu ai, a i Hanauma, a mau ana i Kawaihoa. ‘A’ole na’e i loa’a ma ia lā. (‘A’ole i pau.)

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by Kawaihuelani Center for Hawaiian Language at the University of Hawai’i at Mānoa, supported by the Initiative for Achieving Native Hawaiian Academic Excelle

Pōmaika’i i nā mikanele?

By Kupopou

POSTED: 01:30 a.m. HST, May 07, 2011

Synopsis: An author in 1895 discusses his ideas on issues related to the missionaries who came to Hawai’i.

Aloha mai kākou. Eia mai kekahi māhele o ka mo’olelo i kākau ‘ia ma ka nūpepa Ka Makaainana i ka lā 30 o Kepakemapa o ka makahiki 1895. Penei ia.

Mai ka makahiki 1820 a hiki i ka 1829, e nee mau ana imua na hana a na kanaka Hawaii a me na mikanele. A mai ia wa mai a hiki i ka 1831, ua hoike mai ko ka lahui nee mua ma ke kukuluia ana o na luakini a me ke kulanui o Lahainaluna, a ma ia ano i ikeia ai ua poha mai ka malamalama o ka Euanelio a me ka naauao i na paemoku o Hawaii. Pela i lilo ai na heiau a me na lele i ke Akua ola mau.

Ua lawa ko’u kamailio ana ma keia wahi, no ka mea, aia kona moolelo piha ma ka buke moolelo a makou e pai nei, o ia ka moolelo o ka hookahuli aupuni o Liliuokalani, e hoomaka ana mai kona wa i noho alii ai a me kana mau hana kalaiaina. Aia pu ma keia buke ka moolelo o na mikanele a me kekahi mau mea e ae he nui. I ka wa e puka aku ai keia buke, he mea pono i kela me keia ke lawe i mea e ike ai i na mea i lohe wale ia, a poina ole hoi na mea i hanaia e na poe na lakou i hooikaika ko kakou kulana hookele aupuni mai ka pae ana mai o na mikanele a hiki i keia wa.

A ma keia wahi aku o ka moolelo, e panai aku ana ka mea kakau i na mea ano nui a kuhohonu i hanaia iwaena o keia lahui mai ka pae ana mai o na mikanele i ka 1820, a hiki i ka makahiki i oleloia ai e ua poe la, “Aole e hala he kanalima makahiki i koe, e pau no keia lahui i ka make,” o ia ka makahiki 1878, ka wa i puka mai ai keia mau oleloino a lakou e kaena nei, e like me ka haiolelo a Alapaki Kauka, “He nui na pomaikai o keia lahui i na makua mikanele, a ua aie nui keia lahui ia lakou.” A maluna o keia mau kumu e kalele nei o Alapaki:

1—Na pomaikai o keia lahui i na mikanele;

2—Ke noho aie nei keia lahui ia lakou.

Ma ka pane ana aku o ka mea e kakau nei i na kumu oiaio, o ia no, (1) aole i pomaikai keia lahui i na mikanele, (2) ua poino keia lahui i na mikanele: a no ka aie hoi i na mikanele, ke hoole nei au (1) aohe aie o keia lahui i na mikanele, (2) o na mikanele ka i noho aie i ka lahui. Maluna o keia mau kumu e hiki ai i ka mea kakau ke hoike aku i ka mea oiaio, a na na poe heluhelu e kaana no lakou iho.

Mawaena o ke kowa o ka makahiki 1820 a hiki i ka 1878, ua lilo a ua paa ka hooponopono aupuni ana i na mikanele, mai na pono uhane a na pono aupuni. A ke ninau nei au, heaha na pomaikai i loaa mai i keia lahui, a heaha na hoike oiaio e hooia mai ana ua loaa io i ka lahui na pomaikai? E paneia mai ana paha, o ka pomaikai i loaa i ka lahui, o ia no ka Euanelio. Ina oia ka haina, aole loa ia he haina kupono. Heaha la ia mea he Euanelio a heaha la kona ano maoli. O ka haina oiaio, o ko ke Akua mana ia e oluolu ai, a pela ke Akua i haawi mai ai ia mana i kanaka i mea e ola ai ma ke kino a me ka uhane. He mea maikai ka Euanelio ke malamaia e ke kanaka, aka, ina e haalele wale, e lilo ana ka mana mai ke kanaka aku, a e ili mai ana na hoopai kaumaha maluna o ke kanaka, a me ka lahui holookoa a pau o ka honua nei, no ka mea ua haalele ke kanaka i kona mana e ola ai, a pela ke Akua i hookuu mai ai i ko ke ao nei e hoomana naaupo aku.

(E ho’omau ‘ia aku ana)

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellence.

Loko‘ino maoli

By Kekeha Solis

POSTED: 01:30 a.m. HST, Apr 30, 2011

Synopsis: Questioning the reason for limiting medical marijuana prescriptions to only patients suffering from multiple sclerosis, cancer, HIV, AIDS, and/or glaucoma.

Aloha mai e nā makamaka heluhelu. ‘O ia po’o mana’o e kau a’ela ma luna, he ‘ōlelo ia no nā mea kau kānāwai o Hawai’i nei. Penei ka mo’olelo.

‘O ka ho’ohana ‘ia ‘ana o ka pakalōlō ma ke ‘ano he lā’au lapa’au, he pila ia i ‘āpono ‘ia e ka Hale o nā Lunamaka’āinana a me ka ‘Aha Kenekoa o Hawai’i nei ma ka mahina ‘o ‘Apelila o ka makahiki 2000, a pūlima ‘ia akula ua pila lā e ke kia’āina o ia manawa, e Ben Cayetano. A ua kū nō i kānāwai ma ka mahina ‘o Kēkēmapa o ia makahiki.

Ua ho’olilo ‘ia ka ho’ohana ‘ia ‘ana o ka pakalōlō i mea pono ma ke kānāwai ma Hawai’i nei.

He mea maika’i nō paha ia no ka po’e i lo’ohia i nā ‘ano ma’i ‘ino like ‘ole a ka hapanui o kākou i ‘ike ‘ole ai. Ma ia kānāwai o ke ao mālamalama, ua helu ‘ia aku nō nā ‘ano ma’i e hā’awi ‘ia ai ka pakalōlō i lā’au lapa’au, ‘o ka ma’i ‘a’ai, ‘o ka ma’i ho’omakapō, ‘o ka HIV/AIDS, ‘o ka ma’i ho’omāiloilo, ‘o ka ‘eha kūpiliki’i, ‘o ka naluea kūpiliki’i, ‘o ka huki, ‘o ke oikū mau ke loa’a i ka ma’i ho’olōlō i nā a’alolo a me ka ma’i na’au ‘ūpehupehu paha, a me kekahi mau ma’i, aia wale nō na’e a ‘āpono ‘ia e ke Ke’ena Ola. ‘Eā, ‘a’ole nō i loa’a ko ‘oukou mea kākau i kekahi o ia mau ma’i i helu papa ‘ia aku nei ma luna, eia na’e, ua mōakāka, ‘a’ole i kana mai ka ‘eha ke loa’a aku i ia mau ma’i. A no ia kumu nō paha i lōkahi ai ka mana’o o nā mea kau kānāwai o Hawai’i nei a ‘āpono ‘ia ai ia pila ho’ōla.

‘O ka mea ‘āpiki, aia nō ke kūkākūkā ‘ia a’ela kahi pila hou, ka Pila Kenekoa 1458. A ma ua pila nei, e kaupalena ‘ia ana nā ‘ano ma’i e kuhikuhi ‘ia ai ka pakalōlō i lā’au lapa’au, he mau ma’i helu wale nō koe, ‘o ka ma’i ho’olōlō i nā a’alolo a pau, ‘o ka ma’i ‘a’ai, ‘o ka HIV/AIDS a me ka ma’i ho’omakapō. ‘O nā kānaka i loa’a i nā ma’i ‘ino ‘ē a’e, iā lākou ka puapua. E ō ana ka ‘ōlelo kaulana a kahi hoa o ko ‘oukou mea kākau, ‘o ia ho’i, e aho ka make. Loko’ino maoli ‘oukou e nā hoa (kau kānāwai), ka lilo paha i ka ulaia, aloha ‘ole iho i nā kupu’eu, e ‘au hele nei i ka ‘eha’eha.

‘O ka nīnau paha e kupu a’e, ‘o ia ho’i, no ke aha i mana’o ai nā mea kau kānāwai e ho’ēmi i nā ‘ano ma’i?

Ma ka Hōkū-Avalataisa o ka Pō’akolu nei, ‘ike ‘ia akula ka ‘ōlelo a ke Kenekoa Josh Green, ua nui nā kuhikuhi lā’au lapa’au (no ka pakalōlō) ma Hawai’i moku, a he hapalua o ia huina, ua hā’awi ‘ia aku i nā kānaka i emi mai nā makahiki i ke 30. He mea nui nā makahiki o ke kanaka? No ka pono wale nō ua kānāwai nei o ka po’e i o’o? ‘A’ole pēlā ka ‘ōlelo ma ke kānāwai i ‘āpono ‘ia i ka makahiki 2000.

Pehea ke kuhi nei paha ua kenekoa lā i ka hana kolohe a kekahi po’e kauka o Hawai’i nui a Keawe? ‘O ia ho’i, he hā’awi wale aku i ke kuhikuhi lā’au lapa’au pakalōlō. Inā pēlā, ‘o ia mau kauka ke ho’opa’i ‘ia. ‘A’ole ‘o ka po’e ma’i. E kāpae ‘ia ka Pila Kenekoa 1458 ka pono. ‘O ia ihola i lohe ‘oukou.

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu

a i ‘ole ia, ma ke kelepona:
» 956-2627 (Laiana)
» 956-2624 (Kekeha)

This column is coordinated by Kawaihuelani Center for Hawaiian Language at the University of Hawai’i at Mānoa, supported by the Initiative for Achieving Native Hawaiian Academic Excellence.

He pane i nā manu kapalulu

By Kekeha Solis

POSTED: 01:30 a.m. HST, Apr 23, 2011

Synopsis: A response to people who feel the human services programs, especially programs for Native Hawaiians, are a waste of money.

Aloha mai e nā makamaka mai ka puka ‘ana a ka lā i Ha’eha’e a i kona welo ‘ana aku i ka mole ‘olu o Lehua. ‘Oiai, ua nui ka hauwala’au no kahi mo’olelo o kēlā pule aku nei, nona ke po’omana’o ‘o Kūpihipihi loa kahi koena ‘opihi, eia nō ko ‘oukou mea kākau ke pane aku nei iā lākou.

‘O kekahi mea i ‘ōlelo ‘ia, he mau polokalamu lapuwale nō ia mau polokalamu mālama kanaka, a he ho’opau kālā ho’i. Me ka mana’o nō paha, aia ka pono ‘o ka pepehi ‘ia aku o ia mau polokalamu. Kainō he mau hoa kanaka kākou, eia kā, ‘a’ole nā kānaka ma’i a ‘ilihune paha he hoa kanaka. Aia wale nō a like ke kūlana ikaika a waiwai paha, a laila paha, e lilo i hoa kanaka? A pehea i maopopo ai i ua mau kānaka lā nāna ia ‘ōlelo “he mau polokalamu lapuwale ia”? ‘Eā, ua nui nō nā kānaka i pōmaika’i i ia mau polokalamu. A nui nō ho’i nā kānaka e kōkua ‘ia nei. ‘A’ohe hewa o ia. No ke aha i mana’o ‘ia ai he mau polokalamu lapuwale ia?

A ‘o kekahi mau kānaka, e kuhikuhi ana nō, he mau polokalamu ho’okae ‘ili wale nō ka mea e lawelawe ‘ia a’e nei. Eia kā, he nui nō nā polokalamu e mālama ‘ia nei nā lāhui like ‘ole o Hawai’i nei, ‘o ka Pākē ‘oe, ka Hawai’i ‘oe, ka haole ‘oe, a me ia lāhui aku, ia lāhui aku. ‘O ka polokalamu QUEST kekahi, a me nā polokalamu ho’i e mālama ana i nā ‘ohana o Hawai’i nei, nā ‘elemākule, nā keiki, ka po’e kīnā, a pēlā aku. E kū ana paha i kahi kānāwai a ka Mō’ī Kamehameha, “E hele ka ‘elemakule, ka luahine, a me nā kamali’i a moe i ke ala, ‘a’ohe mea nāna e ho’opilikia.” ‘A’ole wale nō ‘o ka Hawai’i ke mālama ‘ia nei ma ia mau polokalamu.

A inā he nui nā polokalamu e pono ai nā Kānaka Hawai’i, ‘a’ohe hewa o ia. ‘Eā, ‘a’ole i kana mai nā pōmaika’i o ke aupuni moku’āina o Hawai’i i nā ‘āina i kā’ili ‘ia mai ke Aupuni Mō’ī, ‘a’ole nō e pau i ka helu ‘ia.

Na ‘Amelika nō ‘o ia i ho’opilikia, a no laila paha ka pilikia. Inā i kāko’o ‘ole ‘o ‘Amelika iā Kākina mā i ka lā 17 o Ianuali MH 1893, inā ‘a’ole pono ia mau polokalamu. A i ‘ole ia, inā i hahai ‘o Makinalē i ka hana a kona mua, a ka Mea Hanohano Kalivilana, ‘o ia ho’i, ke kauoha ‘ana e ho’iho’i ‘ia ke aupuni i ka Mō’īwahine Lili’uokalani, inā ua ‘oko’a ka mo’olelo o ka Hawai’i. ‘A’ole ho’i e hihi, ua kāko’o nō ‘o ‘Amelika iā Kākina mā i ka ho’okahuli aupuni, a ua holo ka mana’o o Makinalē e kāpae aku i ka mana’o o Kalivilana kūpono a e “ho’ohui ‘āina kū’ai hewa.” A no laila paha ka pilikia.

No laila, mai nō a hopohopo i ka nui o nā polokalamu e mālama nei i nā Kānaka Hawai’i. Ua kū nō i ka pono.

A ‘o ia ihola kahi mana’o i lohe ‘oukou. Ke ho’i akula ko Mānoa keiki ua ahiahi.

(‘Auhea ‘oukou e nā makamaka heluhelu, he kono kēia iā ‘oukou e ke kanaka nui me ke kanaka iki, ke kanaka ulakolako o ka noho ‘ana a me ke kanaka ‘ilihune o ka noho ‘ana, inā he mana’o kou e kākau i mo’olelo no Kauakūkalahale nei, e ho’ouna mai nō iā māua nei ‘o Laiana ma kekahi o nā leka uila ma lalo nei.)

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by Kawaihuelani Center for Hawaiian Language at the University of Hawai’i at Mānoa, supported by the Initiative for Achieving Native Hawaiian Academic Excellence.

Ola loko i ke aloha

By Kekeha Solis

POSTED: 01:30 a.m. HST, Apr 09, 2011

Synopsis: The Kōkua For Japan Benefit Concert is tomorrow.

Aloha mai kākou e nā makamaka heluhelu o Kauakūkalahale.

Ua hū a’ela ke aloha o kākou i nā kānaka o Iāpana i ka ‘ike ‘ana aku nei i nā ‘ino i pāhola akula ma ko lākou ‘āina i ka lā 11 o Malaki.

He keu a ka pō’ino. E nei ana ke ōla’i i laila, ke ōla’i ikaika loa ma ka mo’olelo o Iāpana i ho’opa’a ‘ia.

A ma ia hope koke mai, he kai ho’ē’e a mimiki ko ia ‘āina. A laila, ‘o ka pilikia kekahi ma kahi hana nukelea.

A pau kāuna nō paha i nā ōla’i hou ma hope. Ehia mea aloha ‘o Iāpana a me kona mau kānaka?

Ua ‘ike ‘ia kākou hoa kanaka, ‘a’ole i kipa hewa ke aloha i ka ‘īlio. Mahalo ‘ia aku nā kānaka nāna e mālama aku ana i ka ‘ahamele ‘o Kōkua No Iāpana.

‘O nā pōmaika’i e loa’a ana, no ka pono ia o ka po’e o Iāpana i pilikia i ke ōla’i a me ke kai ho’ē’e mimiki.

Ua nani nō ka ‘ike ‘ia ‘ana o kēia pilina o ko Hawai’i me ko Iāpana i kēia mau lā.

A he pilina paha ia i ho’omaka i ke au i ka hiku o nā lani, iā Kalakāua ho’i, kahi Mō’ī aloha, nāna ka mākia “Ho’oulu Lāhui.”

Ua mana’o ihola ‘o ia e ho’opa’a ‘ia ka pilina o ke aupuni o Hawai’i me ke aupuni ‘o Iāpana ma kekahi mau hana, ‘o kekahi, ‘o ia ka mana’o e male ke Kamāli’iwahine Ka’iulani me ke Kamāli’ikāne Komatsu o Iāpana.

‘A’ole na’e i kō ia mau hana, akā, he pilina maika’i kai ho’oulu ‘ia e ia mau aupuni ‘elua.

‘Oia mau nō ia pilina. Nui nō nā pu’ukani i komo aku i loko o kēia ‘ahamele.

‘O ka nui, no Hawai’i nei nō, ‘o Nā Hoahānau Cazimero, ‘o Kalapana, ‘o Amy Hanaialii, ‘o Eric Gilliom, ‘o Nā Leo, ‘o John Cruz, ‘o Sistah Robi Kahakalau, ‘o Natural Vibrations, ‘o Cecilio lāua me Kapono, ‘o MānoaDNA, ‘o Mailani, ‘o Taimane, ‘o Go Jimmy Go, ‘o Jerry Santos, ‘o Gregg Hammer me kāna pāna, ‘o Jack Johnson, ‘o Jake Shimabukuro, ‘o Loretta Ables Sayre, a me kahi hui ho’okani pahu, ‘o Kenny Endo Taiko.

‘O kekahi, no ka ‘āina ‘ē mai, ‘o Mick Fleetwood, ‘o Michael McDonald, ‘o Willie Nelson, ‘o Pat Simmons o ka hui Hoahānau Doobie, a me Hutch Hutchinson.

E mālama ‘ia aku ana ka ‘aha mele ‘o Kōkua No Iāpana i ka lā ‘apōpō nō, ka lā 10 o ‘Apelila, MH 2011 ma ka pā mau’u nui o ka Hōkele ‘o Hilton Hawaiian Village.

Mai ka hola 12:00 o ke awakea a i ka hola 5:00 o ka ‘auinalā.

‘O ka mea maika’i, ua pau ihola nā likiki i ke kū’ai ‘ia, akā, mai hopohopo, e nā makamaka puni i ka ho’olohe i nā kāhuli leo le’a o ka nahele, he hiki nō ke ho’olohe ‘ia ua ‘ahamele lā ma kekahi mau kānela lekiō a nānā ‘ia paha ma luna o ke kīwī i ia mau hola like nō.

A inā he wahi kenikeni kāu e mana’o ana e hā’awi manawale’a aku, ma ka Lāpule, e ho’olohe i ka lekiō a e nānā paha i ke kīwī, a e kuhikuhi ‘ia ka hana.

Ke ho’i aku nei ko Mānana keiki, ua ahiahi.

Ke aloha.

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellence.

He Kānāwai Poina ‘ia

By Keao NeSmith

POSTED: 01:30 a.m. HST, Apr 02, 2011

Synopsis: The House takes on House Concurrent Resolution 107.

Ma ka lā 23 o Malaki nei, hālāwai ihola ke kōmike pili i nā hana Hawai’i o ka Hale (YouTube: HCR107. Executive Agreement) no ke kūkākūkā ‘ana e pili ana i ka ‘ōlelo ho’oholo a ka Hale, helu 107, ‘o ia kekahi hana e ho’okumu ai i kekahi kōmike nāna e ho’okolokolo i ke kūlana o ‘elua ‘aelike pelekikena i holo i ka 1893 ma waena o ka Pelekikena Grover Cleveland lāua ‘o ka Mō’ī Wahine Lili’uokalani i ho’oili ‘ia ai ka mana mō’ī i ka pelekikena o ‘Amelika no ka manawa ā ho’iho’i hou ‘ia ke aupuni o ke Aupuni Mō’ī Hawai’i. Ma ia kōā o ka manawa, ‘o nā kānāwai o ke Aupuni Mō’ī Hawai’i nā kānāwai mana o ka Pae’āina nei, me ka ho’okō ‘ia aku nō e nā ‘ākena o ‘Amelika ā hiki i ka ho’onoho hou ‘ia ‘ana o ke aupuni o ke Aupuni Mō’ī. Ua puka nō ho’i ka ‘ōlelo ho’oholo me ke kāko’o laulā a e ho’opane’e ‘ia i ka ‘aha holo’oko’a o ka Hale no ke kūkā pū ‘ana.

Ma ka ‘ōlelo ho’oholo, ‘o kekahi mana e hā’awi ‘ia i ua kōmike nei i makemake ‘ia, ‘o ia ka mana e kēnā i ka po’e kūpono e hō’ike waha no ua mau ‘aelike lā.

‘O ke kumu no kēia hana a ka Hale, no ka mea ho’i, mai ka 1849 ā hiki i ka 1875, ua ho’opa’a ‘ia ‘elima ku’ikahi ma waena o ‘Amelika Hui ‘ia a me ke Aupuni Mō’ī Hawai’i. Hui pū nō me nā ‘aelike pelekikena ‘elua o ka 1893 i ‘ōlelo ‘ia ma luna a’e nei e ho’ohiki ana i ka ho’iho’i hou ‘ia mai o ke aupuni o ke Aupuni Mō’ī, lilo kēia mau hana aupuni ‘o ia ke kānāwai ki’eki’e loa o ka ‘āina ‘o ‘Amelika Hui ‘ia, e like me ka ‘ōlelo o ka Paukū VI o ke Kumukānāwai o ua ‘āina lā. Ma ia mana’o nō, ‘o ke kuleana o nā luna aupuni o ia mea i kapa ‘ia ‘o ka ‘State of Hawai’i’, ‘o ia ka ho’okō aku i nā kānāwai o kona haku, ‘o ‘Amelika Hui ‘ia a ho’okō i nā ‘aelike pelekikena ‘elua o ka 1893 a kōkua i ka mālama ‘ia ‘ana o ke koho pāloka e koho ‘ia ai nā luna aupuni hou o ke Aupuni Mō’ī.

Ma ka 1898, ua ho’oholo a’ela ka ‘Aha’ōlelo o ‘Amelika i ka ‘ōlelo ho’oholo hui i kapa ‘ia ‘o ka Newlands Resolution e ho’ohui ana i ka Pae’āina ‘o Hawai’i me ua ‘āina lā. ‘O ka pilikia na’e, e like me ka ‘ōlelo a ka mea kākau, ‘o Sarah Vowell, ma ke ki’i pahu ho’olele ki’i ‘o ka Daily Show ma ka lā 21 o Malaki nei, ua like nō ka mana o kekahi ‘ōlelo ho’oholo hui me ka ho’oholo ‘ana o ke aupuni o ka moku’āina ‘o New Jersey i kekahi lā, ‘o ia ka lā John Bon Jovi. Ua pili nō i ia moku’āina wale nō, a ‘o ia wale iho nō. Pēia pū nō ho’i ka mana o ka ‘ōlelo ho’oholo hui ‘o Newlands, ua pili nō i ka ‘āina, ‘o Amelika Hui ‘ia, a ‘a’ohe kau mai i luna o kekahi ‘āina ‘ē e like me ke Aupuni Mō’ī Hawai’i nei, no ka mea, he ‘āina kū’oko’a nō ia me kona mau kānāwai pono’ī iho i pili i ua ‘āina nei, a ‘o ia wale nō.

Ma ka ho’okō ‘ole ‘ana o nā luna aupuni o ka ‘State of Hawai’i’ i nā kānāwai o ‘Amelika, hewa lākou i ke kipi i ko lākou aupuni. ‘O ka ho’okō ‘ia ‘ana o nā kānāwai o ‘Amelika ka mea e hō’ike ai i ke aloha o nā kupa o nā moku’āina 49 o ua ‘āina lā i ko lākou aloha i ko lākou ‘āina.

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellence.

He Nīnau Aupuni

By Keao NeSmith

POSTED: 01:30 a.m. HST, Mar 26, 2011

Synopsis: Judge Colleen Kollar-Kotelly acknowledges the validity of the Cleveland-Liliuokalani Agreement.

Ma ka lā 9 ihola o kēia mahina nei, hoʻopuka mai nei ka Luna Hoʻokolokolo ʻĀpana o ʻAmelika Hui ʻia, ʻo Colleen Kollar-Kotelly, i kāna ʻōlelo hoʻoholo no ka hihia o David Keanu Sai kūʻē i ke Kuhina Aupuni o ʻAmelika, ʻo Hillary Clinton, ke Kuhina Kūpale, ʻo Robert Gates, a me ka ʻAkimalala Robert Willard.

ʻO ka nīnau o ua hihia nei, ʻo ia ka hoʻopiʻi ʻana o Sai iā Clinton mā no kāna hōʻike ua ʻaʻe ʻia kona mau kuleana kīwila ma kona ʻaoʻao he kupa ʻo ia o kekahi ʻāina ʻē, ʻo ia ke Aupuni Mōʻī Hawaiʻi, a ua hōʻeha a hoʻopōʻino ʻia ʻo ia ma muli o ka hoʻonoho ʻia ʻana o nā pūʻali koa ʻAmelika ma nei paeʻāina.

Hoʻokumu ʻia kēia hoʻopiʻi ʻana ma luna o ka hoʻokumu ʻia ʻana o kekahi hui e Sai lāua ʻo Donald Lewis i ka 1995 a kapa ʻia ʻo ka Perfect Title Company, he hui nāna hoʻokolokolo i nā palapala ʻona ʻāina o Hawaiʻi nei. Ma ia makahiki hoʻokahi nō, hoʻokumu nō hoʻi lāua i kekahi hui, ʻo ia ʻo ka Hawaiian Kingdom Trust Company nāna e hoʻokō i nā kuleana o ke aupuni o ke Aupuni Mōʻī Hawaiʻi ma ke ʻano pani hakahaka kūikawā ā hiki i ka wā e hoʻihoʻi hou ʻia ai ke aupuni kū i ke kānāwai o ke Aupuni Mōʻī. I ka 1996, hoʻopuka ka Hawaiian Kingdom Trust Co. he kuahaua he hoʻopiʻi ia no nā palapala ʻona ʻāina a pau o ka Paeʻāina no ka hoʻokō ʻole ʻia o nā kānāwai o ke Aupuni Mōʻī Hawaiʻi.

Ma ka 1997, hopu ʻia ʻo Sai lāua ʻo Lewis e nā mākaʻi o ka Mokuʻāina ʻo Hawaiʻi a hoʻopaʻahao a hōʻāhewa ʻia no ka ʻaihue, ka hoʻoweliweli kāʻili kālā, a me ka hōʻalo uku ʻauhau no ka hana a ko lāua mau hui.

Ma ka ʻōlelo hoʻoholo a ka Luna Hoʻokolokolo Kollar-Kotelly, ua ʻae ʻokoʻa ʻo ia i ka moʻolelo o ke Aupuni Mōʻī Hawaiʻi, ʻo ia hoʻi, he aupuni kūʻokoʻa ia a hoʻokahuli ʻia kona aupuni i ka 1893 a hoʻoholo ʻia ma ka hoʻokolokolo ʻana ua hewa nā kuhina pūʻali koa ʻAmelika ma ke kōkua ʻana i ka hoʻokahuli ʻana i ke aupuni o ke Aupuni Mōʻī a ua hoʻoili ka Mōʻī Wahine Liliʻuokalani i kona mana mōʻī i ka pelekikena o ʻAmelika, ʻo Grover Cleveland, ā hiki i ka wā e hoʻihoʻi hou ʻia ai kona aupuni.

Ma ka hoʻoholo ʻana i kona manaʻo, hoʻoholo aʻela ka Luna Hoʻokolokolo Kollar-Kotelly he nīnau pili kānāwai nō ka nīnau nui o kēia hihia—ʻoiai he kānāwai nō hoʻi ke kauoha mana hoʻokō a Cleveland a he hiki ke hoʻoholo ʻia ma kona ʻaha hoʻokolokolo—eia kā, ma kāna hōʻike, ua ʻoi aʻe ke ʻano pili kālaiʻāina ʻo ka hoʻokō ʻole ʻia ʻana o ka hoʻoili mana ʻana a Liliʻuokalani a ʻaʻohe mana o kona ʻaha hoʻokolokolo e hoʻokahuli i ka hana kālaiʻāina o ke aupuni o ʻAmelika, a no laila, hoʻopau ʻo ia i ka hoʻopiʻi ʻana o Sai iā Clinton mā a ma kona manaʻo na ka māhele pili kālaiʻāina o ke aupuni ʻAmelika e hoʻoholo i kēia nīnau.

Ma kāna ʻōlelo hoʻoholo, hōʻike ʻo Kollar-Kotelly ua pili ka ʻaelike o Liliʻuokalani me Cleveland i ke kānāwai. Inā pēlā nō, nāna e hoʻoholo: he ʻaʻe kānāwai ka hoʻomau ʻana o ʻAmelika i Hawaiʻi nei.

E hoʻouna ʻia mai nā leka iā māua, ʻo ia hoʻi ʻo Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawaiʻi at Mānoa, supported by the Initiative for Achieving Native Hawaiian Academic Excellence.

CORRECTION

» The English-language synopsis for the Hawaiian-language column “Kauakukalahale” on Page A15 Saturday should have read: Judge Colleen Kollar-Kotelly acknowledges the validity of the Cleveland-Liliuokalani Agreement. The column included an incorrect synopsis.

 

I Ulu I Ke Kumu

POSTED: 01:30 a.m. HST, Mar 19, 2011

Synopsis: The “I Ulu I Ke Kumu” award honors individuals who have made a commitment to excellence in native Hawaiian education.

Aloha mai kākou e nā makamaka heluhelu mai Hawai’i moku o Keawe, a Ni’ihau a Kahelelani.

He nū ‘oli ke hō’ike ‘ia a’e nei, ‘o ia ho’i, e kau ana kekahi mau kānaka i ka hano hāweo, ‘o ia ho’i, e lilo ana ka Makana “I Ulu I Ke Kumu” iā lākou i kēia ahiahi. ‘O “I Ulu I Ke Kumu,” he makana ia no ke ‘ano kanaka i lilo i kumu maika’i e ulu pono ai nā lālā o Hawai’i nei. ‘O ka inoa o nei makana, no kahi ‘ōlelo no’eau ia, ‘o ia ho’i, “I ulu nō ka lālā i ke kumu.” A ‘o ka mana’o o ia ‘ōlelo, ‘o ia ho’i, e ‘ole ko kākou po’e kūpuna, ola ai a holo mua ai kākou. He nui nō ka mahalo i ua mau kūpuna nei, a ‘o kēia makana, he hō’ike ia i ka mahalo i nā kūpuna a me nā kānaka e ho’oulu nei i nā lālā a me nā pua o kēia ao nei ma o ke alaka’i ‘ana, ke a’o ‘ana a pēlā aku.

‘O kēlā makahiki aku nei ka makamua o ka ho’ohanohano ‘ia ‘ana o ka po’e “kumu” nāna i noke i ka hana e holo mua ai ka Hawai’i. A eia mai ia mau Hawai’i Alaka’i, ‘o Uncle William Aila makua, ‘o Manu Kaiama, ‘o Lilikalā Kame’eleihiwa, ‘o Oz Stender, ‘o ‘Anakē Lolena Nicholas, ‘o Haunani-Kay Trask, a me ka Hui Ho’okahe Wai Ho’oulu ‘Āina.

Ma lalo nei nā moho o kēia makahiki nei.

— ‘O Alan T. Murakami. He loio ‘o ia, nāna i alaka’i i ka Native Hawaiian Legal Corporation no ka pono o ka Hawai’i ma ke kuleana ma ka ‘āina a me ka wai, ka pono o nā iwi kupuna, ka ‘āina i kā’ili ‘ia mai ke aupuni Mō’ī, ke kānāwai ‘Āina Ho’opulapula Hawai’i a me nā mea ‘ē a’e e pono ai ka Hawai’i.

—’O Kū H. Kahakalau. Na ia nei i ho’oulu i ke Kula Ho’āmana o ke Kenekulia Hou ‘o Kanu o ka ‘Āina. Nāna nō ho’i i ho’okumu me kekahi i ka Hālau Wānana. ‘O ka mua nō ia o ka polokalamu a’o kumu o ka moku’āina ‘o Hawai’i, i pili ‘ole i kahi kulanui.

—’O Naomi Noelaniko’olau Clarke Losch. He limahana ‘o ia nei no ke ke’ena huli kanaka o ka Hale Hō’ike’ike o Kamehameha. A laila, lele akula i ke Kulanui Kaiāulu o ‘Ewa, a ma laila i a’o aku ai i ka ‘ōlelo Hawai’i no nā makahiki he 24. A i ka makahiki 1994, ho’omaka ihola ke a’o ma ke Kulanui o Hawai’i ma Mānoa a i kona ho’omaha loa ‘ana aku mai ka ‘oihana aku, ma ke ‘ano he polopeka i ka makahiki 2010. He 40 makahiki o ka ho’ōla ‘ana i ka ‘ōlelo Hawai’i.

—’O S. Haunani Apoliona. ‘O ka luna ho’omalu ‘o ia nei o ka Papa Kahu Waiwai o ke Ke’ena Kuleana Hawai’i. A e ku’upau ana ‘o ia i ka hana e pono ai nā Kānaka Maoli no nā makahiki he 30 a ‘oi ma ke Ke’ena Kuleana Hawai’i, ma ka Hui ‘o ALU LIKE, a me nā hana kaiāulu like ‘ole a me kāna hīmeni ‘ana.

I ulu ‘i’o nō ka lālā i ia mau kumu.

Inā he nīnau kāu, a he mana’o paha e ho’ohanohano aku i kekahi kumu i ulu ai nā lālā he nui a ikaika e kāhea aku iā Hawai’inuiākea, ke Kula ‘Ike Hawai’i ma ka helu, 956-0980.

———

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:

» kwong@hawaii.edu

» rsolis@hawaii.edu

a i ‘ole ia, ma ke kelepona:

» 956-2627 (Laiana)

» 956-2624 (Kekeha)

This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellence.

 

Aloha kā ho’i i ka wa’a waiho wale …

By Hiapokeikikāne K. Perreira

POSTED: 01:30 a.m. HST, Mar 12, 2011

Synopsis: This expression of love and rememberance for Herb Kawainui Kāne, who recently passed on, was submitted by our good friend Hiapo Perreira of the University of Hawai’i at Hilo.

‘Auhea wale ana ‘oukou, e nā Luna Ho’oponopono kia’i ‘ōlelo ola o ka Hōkū Buletina nei, ka hōkū ho’olaha o ka Pākīpika ‘Ākau e wewelo a’e nei, a wewelo a’e nei, ke aloha nui a māhuahua wale.

E ‘ae ‘olu’olu ‘ia mai kauwahi ōpū ka’awale o ko kino e ‘a’a aku ai i ke aloha i ka mea hele loa, iā Herb Kawainui Kāne, i lele iho nei kona aho hope o kēia noho kino kanaka ‘ana, a ne’e akula e kau i ka nalu po’i’ula a Kāne me Kanaloa. He’e ana nō ē, he’e ana nō lā, pae aku ana i ka hea a kūpuna: he wai makamaka e pau ai ka ‘e’a kai, he pa’ūpa’ū makamaka e hume ai, he ‘ai makamaka e kāmau ai, he i’a makamaka e mūkā ai, he kapa makamaka e pumehana ai, he uluna makamaka e kau keha ai, moe, moe loa i ka ‘olu mālie o ka hā loa, ka hā iki o ka pō uli, ka pō hiwa, ka pō ana ‘ole.

Aloha kā ho’i ka wa’a
waiho wale,
‘O Kawainui, ua nalo!
‘O ke kia o ia wa’a, ua
hakanū,
‘O ka pe’a o ia wa’a, ua
loha,
‘O ke ama me ona ‘iako
wa’a, ua ‘oni ‘ole,
‘O ka manu mua, ka manu
hope o ia wa’a, manu
manu ho’i ka pilihua,
‘O ke ka’ele o ia wa’a, ua
luhi hewa ho’i, ua moku
mokuāhua!
E Po–la, ‘a’ole ‘oe e ‘e’e
hou ‘ia e Kawainui,
E Kau–la, ‘a’ole ‘oe e huki
hou ‘ia e Kawainui,
E Hoeu–li, ‘a’ole ‘oe e uli
hou ‘ia e Kawainui!
‘Auhea kā ho’i ‘o Ka-
wainui, ka mea nāna i
ho’ohua a puka i ke ao,
Ao wale maila i ia wa’a
waiho wale,
Wa’awa’a na’e i ka pili ka-
naka ‘ole!
Ke ho’olewa aku nei i ke
aloha, he kipona,
Ke ho’olewa aku nei i ke
aloha, he kū’i’o,
Ke ho’olewa aku nei i ke
aloha, he lipolipo.
Ua pau ē ka luluhi,
Ua pau ē ka ‘eha’eha,
Ua pau ē ka ‘ōnāwali, ua
maha, ua moe.
Me ke aloha ho’omau iā ‘oe, e Kawainui, a mau a mau, na ke Kōmike

Eia mākou nā luna ho’oponopono o nei kolamu ‘o Kauakūkalahale ke hā’awi pū aku nei i ko mākou aloha pumehana i ka ‘ohana a me nā hoapili o Herb Kawainui Kāne i kēia wā lu’ulu’u o ke kaumaha. Ma waena mai o kāna mau hana he nui, ua kaulana nō ‘o ia i ke kaha ‘ana i nā ki’i e hō’oke ana i ka po’e kahiko e lawelawe ana i kahi hana ma’amau, ‘o ka holo moana, a he nui nō ko mākou mahalo i kona ho’oikaika ‘ana ma ia hana. He hana ia nāna e hō’eu’eu i ka no’ono’o a ‘ike ai ho’i kākou i ke ‘ano o ka nohona a ko kākou mau kūpuna o ia wā i hala loa akula. He mau ki’i nō ia i kuni ‘ia maila ma luna o ko kākou mau na’au a e lilo mau ai ka no’ono’o i ka nohona o nā kūpuna. Mahalo nui iā ‘oe e Kawainui i ka hō’ike ‘ana mai i ka mea a kou na’au i ‘ike ai. LH

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellence

Ua ‘ike ‘ia paha kākou hoa kanaka?

By Kekeha Solis

POSTED: 01:30 a.m. HST, Mar 05, 2011

Synopsis: We are on the right track with the governor’s courageous signing of Senate Bill 232. Or are we?

Aloha mai e nā makamaka heluhelu o Kauakūkalahale. I kēlā pule aku nei, ‘akahi nō a lilo i kānāwai ka pila e ‘ae ana i ka “uniona kīwila” ma ke kānāwai i ka pūlima ‘ana aku nei o ke Kia’āina Neil Abercrombie. A e mahalo aku kākou iā ia no ia hana kūpono, i hana ‘ole ‘ia e kona mua. I loko nō na’e o ia ‘ano holomua, eia mai kahi nīnau, ua ‘ike ‘ia paha kākou hoa kanaka? A i ‘ole ia, e kipa hewa auane’i paha ke aloha i ka ‘īlio?

He hana wiwo ‘ole kā ke kia’āina hou, ‘oiai, i kēia manawa, he hiki nō i ke kanaka, he kāne a he wahine paha, ke komo aku i loko o ka “uniona kīwila” me kona kōko’olua aloha, he kāne paha a he wahine paha. ‘O ka mea ‘āpiki, ‘a’ole i mōakāka ko ke kia’āina kumu i hana ai pēlā. ‘O kahi ‘ōlelo a ke kia’āina, ‘o ka pūlima ‘ia ‘ana o ia pila i kānāwai, he hō’ike ia i ko ka honua nei, ua hāmama ka ‘īpuka o ko mākou wahi ōpū weuweu lā, no ‘oukou ia, a he hō’ike nō ho’i ia, he mau hoa hānau nā mea a pau ma kēia palekaiko nei, ‘o Hawai’i. (‘Eā, kohu ho’olaha ia ‘ano ‘ōlelo e paipai ana i nā kānaka e hele mai i ne’i nei e noho ai.) Ua hāmama kā ka ‘īpuka o ko kākou wahi ōpū weuweu? He nui nā kānaka o Hawai’i nei e kū’ē aku nei i ka ‘uo ‘ia ‘ana aku o ke kāne me ke kāne, a o ka wahine paha me ka wahine, i ka mānai ho’okahi, ‘o ia ho’i, ka hui ‘ana ma ke ‘ano “uniona kīwila” a male paha. A no laila, ‘a’ole paha kēia ‘āina he paredaiso, ke ‘ike aku i nā kānaka e kū’ē aku ana i kou ‘ano a me ke ‘ano paha o kou noho ‘ana. Pehea, ma muli o ka pono o ke kanaka i pūlima ‘ia ai ka Pila Kenekoa 232? A ma muli paha o ka pono o ke kūlana waiwai o kēia moku’āina?

A ke ho’ohālikelike ‘ia aku ka “uniona kīwila” me ia mea he male, ‘a’ohe nō i kau like. ‘O ka pa’a “uniona kīwila,” ‘a’ole e loa’a nā pōmaika’i pekelala a pēia pū me nā pono pekelala. ‘O nā pono a me nā pōmaika’i wale nō o ka moku’āina ke loa’a. A ‘o kekahi pilikia, ke pa’a ia ‘ano uniona ma kēia moku’āina nei ‘o Hawai’i, ‘a’ole e helu ‘ia e nā moku’āina kū’ē. No laila, inā awaiāulu ‘ia ke kāne me ke kāne, a ‘o ka wahine paha me ka wahine ma Hawai’i nei, a ma hope aku, ‘upu a’e ka mana’o, e ne’e aku i kekahi moku’āina, ‘a’ole e hiki ke ne’e wale aku. He mau moku’āina helu wale nō ke ‘ae nei i ia ‘ano hui ‘ana ma ke kānāwai. Aia wale nō paha a ‘ae ‘ia ma ke kānāwai ma kekahi moku’āina, a laila e helu ‘ia nō he “uniona kīwila” ma ia moku’āina.

Ua holomua nō, a piha hau’oli paha ka na’au o ke kanaka e mana’o ana e ho’ohui ‘ia me kona kōko’olua aloha ma lalo o ke kānāwai, akā, ‘a’ole paha i pau ka hana e pono ai.

E ‘ike ‘ia kākou hoa kanaka o kipa hewa ke aloha i ka ‘īlio.

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellence

Hele nō ka ‘alā, hele nō ka lima

By Laiana Wong

POSTED: 01:30 a.m. HST, Feb 26, 2011

 

 

STAR-ADVERTISER FILE

Taro grows on a farm in Wailua.

Synopsis: A bill to allow the sale of hand pounded poi meets resistance at the Legislature.

Aloha mai kākou e nā hoa heluhelu. He nīnau hou i kupu maila ma loko o ka ‘aha’ōlelo e pili ana i ke kū’ai ‘ana i ka pa’i’ai i ku’i lima ‘ia. Eia nō i kēia mau lā e ne’e nei he mau kānaka e ku’i nei i ka ‘ai e like nō me ka hana a ko lākou mau kūpuna o ka wā kahiko, ‘o ia ho’i, me ka pōhaku a me ka papa ku’i ‘ai. A he ‘oia’i’o nō ka ‘ono o ka pa’i’ai, ‘a’ohe wahi ‘ano like me ka pa’i’ai e kū’ai ‘ia nei i loko o nā mākeke. ‘O ia ‘ano poi, na ka mīkini no e “ku’i” ma o ka wili ‘ana. ‘Eā, ‘a’ole kēia he mana’o hō’āhewa i ka mīkini, ‘o ka wali loa ka pilikia no ka po’e e ‘ono nei i ka pa’i’ai. A ua maopopo, he nui ka po’e e kū’ai nei i ka poi, pehea lā kona ‘ano wali, a i kekahi manawa, ‘o ka ‘ūlōlohi o ka hō’ea i ka halekū’ai, ua pau kēlā poi wali i ke kū’ai lilo ‘ia.

Pehea ka pa’i’ai i ku’i lima ‘ia? ‘O ka mea ‘āpiki, he kānāwai e pāpā ana i ke kū’ai aku i kēia ‘ano poi i ku’i lima ‘ia e like me ka hana o ke au kahiko, a ‘o ia ihola ke kumu i hāpai ‘ia ai kēia pila, ‘o ka H.B. 1344 H.D. 2, i mua o nā luna maka’āinana o ka ‘aha’ōlelo a ke lohe ‘ia nei e kekahi kōmike i noho luna ‘ia e Robert Herkes (D) no Ka’ū. Na kēia pila e ‘ae i ka po’e ku’i ‘ai e kū’ai i kā lākou pa’i’ai ma waena o ka lehulehu. ‘O ua luna maka’āinana nei na’e, eia nō ke hōkai nei i ka holo pono ‘ana o ka pila ma o ka hō’ole ‘ana e mālama i kahi lohe ‘ana. ‘O ke kumu nui a ua Herkes nei o ka hō’ole ‘ana, wahi āna ‘a’ole hiki ke ho’okō ‘ia ke lilo i kānāwai. Eia na’e, wahi a ka Papa Ola, ‘a’ole ho’onui ‘ia kā lākou hana ma muli o kēia pila me ia e kākau ‘ia nei, a ‘a’ole ia he mea ho’oluhi iā lākou. ‘O ka ‘oia’i’o, he mea ia e emi ai ka nui o kā lākou hana, no ka mea, ‘a’ole lākou pono e nānā i ka loa’a a me ka ‘ole o ka palapala ‘ae a kēlā me kēia kanaka kū’ai i ka pa’i’ai i ku’i lima ‘ia. Inā paha e kupu mai kekahi kumu e namunamu ai ka po’e kū’ai, a he pono ka ho’oponopono ‘ana a ka Papa Ola, ‘a’ole nō e ho’onui ‘ia kā lākou hana. A no laila, he hana kā ka luna maka’āinana Herkes? Kohu mea lā, ke hopohopo nei e hopohopo ai.

Ho’omana’o a’ela au i kekahi hihia i kupu mai he iwakālua makahiki aku nei, i ka wā ho’i i ho’okumu ‘ia ai he polokalamu ‘aina awakea no nā keiki o ka Pūnana Leo. Ua mana’o ‘ia he mea maika’i ka hānai aku iā lākou i ka poi. Eia na’e, wahi a ka Papa Ola o ia au, ‘a’ole hiki ke hānai ‘ia nā keiki i ka poi me ka loa’a ‘ole o kekahi pāpaa palaoa, a no ka mea, ‘a’ole i ‘āpono ‘ia ka poi ma ke ‘ano he lālā no nā hui mea’ai nui ‘ehā. ‘O ka mea ‘āpiki, ‘a’ohe hopena pāheu (allergic reaction) ke ‘ai aku nā keiki loa’a wale i ia ‘ano ma’i. Kohu mea lā, ‘a’ohe ‘ano loli o ka mana’o i loko o kēlā mau makahiki he 20. He aha lā ke kumu e kū’ē ‘ia ai ka pa’i’ai?

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellence

‘Auhea kēlā mea whiffa?

By Laiana Wong

POSTED: 01:30 a.m. HST, Feb 19, 2011

Synopsis: Part of the Deep Waters series of film productions being exhibited at the University of Hawaii includes the 10th film produced by Eddie and Myrna Kamae entitled “Those Who Came Before.”

‘Auhea ‘oukou e nā hoa heluhelu o ka ‘ōlelo ‘ōiwi o nēia pae mokupuni. He mea maopopo iā kākou ke ‘ano o ia mea ‘o ke au ‘ana o ka manawa. ‘A’ohe mea nāna ia e ho’okū. Eia na’e, ua hiki mai nō nā mea hou o ka ‘āina nāna e kōkua iā kākou i ka mālama ‘ana i nā ‘ike kahiko i loa’a wale ai i nā keiki o kēia au ke lālau aku. ‘O ka pa’i wikiō ‘ana kekahi ala e ho’oili ai i nā ‘ike i pa’a i ko kākou po’e mai kekahi hanauna a i kekahi hanauna aku, a he ala ho’i ia e hiki ai iā kākou ke ‘ike maka i ko lākou lā helehelena a lohe pepeiao i ko lākou mau mana’o. Eia hou ho’i, i ala nō ia e pa’a ai ka ‘ike o ko kēia wā a mālama no nā hanauna e hiki mai ana.

I ka pō Pō’ahā nei, ‘o ko’u hele ia i ka Hālau o Haumea, kahi e nānā ai i ka ‘umi o ke ki’i’oni’oni i ho’opuka ‘ia e Eddie lāua ‘o Myrna Kamae i kapa ‘ia Those Who Came Before, a i ho’opuka ‘ia ma lalo o ka Hawaiian Legacy Series. Ma mua na’e o ka hō’ike ‘ia mai o ke ki’i’oni’oni, ua mālama ‘ia he pānela no kahi po’e hana ki’i’oni’oni e hō’ike ai i ko lākou mau mana’o no ka waiwai o ia hana. Nui ko’u mahalo i ka ‘ike hou ‘ana iā Puhipau lāua me Joan, ka po’e nona ‘o Nā Maka o ka ‘Āina a nāna i pa’i aku he kanaiwa a ‘oi ki’i e pili ana i nā ‘ano paio like ‘ole o nā Hawai’i no ka pono. E kala loa ko’u ‘ike ‘ana iā lāua a i ka lohe ‘ana i ka ‘ōlelo a Puhipau, hāli’a ka mana’o i ka wā i māhanahana ai ka paio ‘ana. Aloha nō ia mau lā.

Ma mua o ka hō’ike ‘ia mai o Those Who Came Before, ua hānai ‘ia mai ke anaina i kekahi mau ‘īna’i e nā ai ka ‘ono a ka pu’u. ‘O ia nō kekahi mau ki’i pōkole i haku ‘ia a pa’i ‘ia e nā haumāna o ka papa HWST 362 i a’o ‘ia e Kimo Armitage, a i kapa ‘ia ‘o He Aha ka Waiwai a ‘o Ho’okalakupua, a me kekahi ki’i Kāmoa i hana ‘ia e Robert lāua me Daniel Poleki i kapa ‘ia ‘o Malaga. He keu ka hau’oli i ka ‘ike ‘ana i ke kālena o ka po’e ‘ōpio e ‘a’a nei i ia hana.

No ke ki’i a Eddie me Myrna Kamae, ua hō’ike ‘ia ka po’e kūpuna nānā i waiho mai i ko lākou ‘ike a me ko lākou mana’o no nā mele Hawai’i a nāna ho’i i kōkua iā Eddie ma loko o kāna hana a me kona huaka’i ho’ona’auao no ke mele Hawai’i. Ua hoihoi kona mo’olelo, no ka mea, ma kona ho’omaka ‘ana i ka ho’okani pila, ‘a’ole ‘o ia i ho’okani i nā mele Hawai’i, a ‘o kona makuakāne kai koikoi iā ia e huli aku a nānā i kona ho’oilina. A no laila, ua ‘imi akula ‘o ia i ka ‘ike e pono ai ka haku ‘ana i kāna mau mele Hawai’i. ‘O Mrs. Pukui, ‘o Pilahi Paki, ‘o Iolani Luahine, a ‘o Sam Li’a kekahi o kāna mau kumu nāna i alaka’i iā ia ma kēia huaka’i.

Ma loko o kona a’o ‘ia e kēia po’e kaulana i ka haku mele, ua kupu mai kekahi ha’awina nui. ‘O ka ‘ike nui ia a lākou i waiho maila. ‘O ia ho’i, he mea nui ka hīmeni ‘ana no nā kamali’i. He mana’o maika’i nō ia, no ka mea, i hoihoi nā kamali’i ‘o ia nō ka mea e mau ai ia ‘ike, a pēia nō ho’i nā ‘ike Hawai’i he manomano a lehulehu.

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellence.

‘Aha ‘Ōiwi Puni Honua

By Laiana Wong

POSTED: 01:30 a.m. HST, Feb 12, 2011

Synopsis: The First World Parliament of Indigenous Peoples was convened in Tumkur, India, last month.

Aloha mai nō kākou e nā hoa ‘ōiwi o ka honua nei a puni. I kēlā pule aku nei ua ‘ike ‘ia ke kūlana kūpiliki’i o ka nohona o ka po’e Dalit o ‘nia a me ka hau’oli loa i ka loa’a mai he mau ipulua i ho’ohiki ‘ia mai e kekahi maka hanohano o ke aupuni. ‘O ke kumu nui na’e o mākou i haiamū ai i laila, ‘o ia nō ka hana pū ‘ana me kekahi po’e ‘ōiwi he 10 lāhui like ‘ole, mai ‘ō a ‘ō o ka honua, ma ka ho’okumu ‘ana i kahi ‘ōlelo kuahaua e waiho ai ma ka U.N. a i mua ho’i o ke ao holo’oko’a. Eia ma lalo nei ka unuhina o ka mana’o nui o ia kuahaua.

» I ulu ka lāhui kanaka o ka honua nei i ka huki like ‘ana o nā ikaika pili ‘uhane i ho’okumu ‘ia ma loko o ka po’e ‘ōiwi ma o ka paio mau ‘ana no ka pono.

» Ua pilikia nui kākou po’e ‘ōiwi i ka hana ‘ino ‘ia iho nei o ke ao, ‘oiai ‘o ke kino ia o Papa a ua maika’i ka noho pū ‘ana o kākou me ia i loko o nā kau a kau. Ke pilikia ke ao, ua pilikia pū ke ola o ka po’e ‘ōiwi. Ua pili hemo ‘ole mai ka noho ‘īnea o ka po’e ‘ōiwi me ka noho ‘īnea o ke ao. ‘O mākou, The World Parliament of Indigenous Peoples, ‘a’ole wale nō mākou e nānā maka.

» Na ka hō’āpono ‘ia o ka United Nations Declaration on the Rights of Indigenous Peoples e hō’ike mai i ke ‘ano kūpa’a o ia ‘aha ma hope o ka pono o ka po’e ‘ōiwi o ka honua nei. He mea i hō’ike ‘ole ‘ia ma mua.

» Eia hou ho’i, na kēia kuahaua e hō’ike mai ē ‘o ka wā nō kēia e huki like ai ka po’e ‘ōiwi o ke ao ma nā hana e pono ai ke kaiāulu ‘ōiwi a me ko ka honua nō ho’i a puni.

» Ma o ka ho’okumu ‘ana i nēia ‘aha ‘ōiwi e ho’olōkahi ai ka po’e ‘ōiwi ma ka huki like ‘ana, ke kūkākūkā ‘ana, ka ho’oholo ‘ana, ka maka’ala ‘ana, a me ke kāko’o ‘ana ho’i i ka pono o ka po’e ‘ōiwi a me ko kākou mau kaiāulu.

» He mea maika’i ka pilina o nā po’e ‘ōiwi. A ua pa’a ko kākou mana’o ē he kōkua nui ko kākou ‘ike a me ke kuana’ike ma ka ho’oponopono ‘ana i nā pilikia o nā kānaka a me nā mea ola ho’i o ke ao nei, a me ka ho’omau ‘ana i ko kākou ola. ‘O ko kākou kuleana nō ia.

» I mea e mākaukau ai no ka ‘aha WIPCE o ka makahiki 2014, ke kono aku nei mākou i nā aupuni ‘ōiwi a pau pū ho’i me nā hui ‘ōiwi like ‘ole o ka honua nei e komo pū ma nā hana like ‘ole e pono ai ka holomua ‘ana o nā hana politika o ka honua nei.

» ‘O kekahi kuleana o ka World Parliament, ‘o ia nō ka hō’ike ‘ana aku, i mua o ke ākea, ke ‘ano a me ka waiwai ‘i’o o ia mea he ‘ōiwi. A ‘ikea nō, e maopopo ana i ka po’e a pau o ka honua nei eia nō ma loko o ka po’e ‘ōiwi o ka honua ke akamai e ‘ike ai i ka ha’ina o nā pilikia e noho hāhā pō’ele’ele nei ka po’e o ka honua i kēia wā.

‘O ia ihola nō ka mana’o nui o ua ‘aha nei i ‘ike ‘oukou. He kāko’o paha, ‘a’ole paha.

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellence.

Hau’oli lua ka po‘e ‘ōiwi o ‘nia?

By Laiana Wong

POSTED: 01:30 a.m. HST, Feb 05, 2011

Synopsis: Many of the indigenous Dalit people of India live in abject poverty with literally no pot to urinate in. Such abject poverty is certainly difficult for us to imagine.

Aloha mai nō kākou e o’u hoa puni heluhelu o Kauakūkalahale. I ‘nia aku nei kēia a ‘ike akula nō i ka mea ho’omāna’ona’o e ‘ō’ū ai i ka ‘ōnohi maka o ke kamahele, ‘o ia nō ka nohona o ka po’e Dalit, ka po’e ‘ōiwi ho’i o ia kaha. ‘O lākou kai kono mai iā mākou, he mau kānaka ‘ōiwi mai ‘ō a ‘ō, e hele aku i ‘nia no ke kūkākūkā i nā mea e pono ai ko kākou nohona. I ko mākou kipa aku iā lākou, ua ‘ikea ke kūlana ‘ilihune a ho’okae ‘ili ‘ia ho’i o ia po’e, a me ke ‘ano ho’omāna’ona’o o ko lākou nohona. A ‘o ka mea e wāhi ai i ka pūniu, he 240 miliona ko lākou nui, a ma kahi ho’i ia o ka hapahā o ka nui o ka po’e o ‘nia.

He nui hewahewa nā mea e hō’ike ai, no ka mea, ‘oko’a loa ke ‘ano o ko lākou lā nohona a ‘oko’a ho’i ka mea i ma’a iā kākou ‘a’ole na’e e pau i ka helu ‘ia ma loko o nei wahi kolamu. ‘O ka’u na’e e hō’ike ai, ua pili nō i ka ho’opau pilikia ‘ana. Ma mua nō o ke kau ‘ana ma luna o ka mokulele, a’oa’o ‘ia maila au e ke kauka e ‘ai i kekahi huaale no ka pale ‘ana i ka mū halihali malaria, a he mau pule nō ka lō’ihi o ia hana. Eia nō ho’i au ke ‘ai nei i kēlā huaale a hiki i kēia lā a he mau pule nō koe! Ua ‘ōlelo ‘ia he hī ka hopena ke loa’a i kēlā ‘ano ma’i. ‘A’ole na’e kākou e lu’u i ia kai i kēia manawa.

‘O ka mea e ho’omaopopo ai, ua ma’a ka po’e o ‘nia i ka ‘ai ‘ana i kā lākou mea’ai a me ka inu ‘ana i kā lākou wai. Ma ko mākou noho ‘ana ma laila, ua pau loa kā mākou mea’ai i ka ho’omākaukau ‘ia e kekahi kuke no ka hokele mai, i ‘ole e helele’i ‘o hope. Ua pōmaika’i nō na’e mākou, no ka mea, he lua ko kēlā me kēia hale o ka “ashram”. ‘O ka po’e na’e o ka ‘āina, he kāka’ikahi nō paha ka lua, a no laila, hele aku nō lākou i waho o ke kula mau’u kahi e ho’opau pilikia ai. He ‘ōku’u ka hana i mua nō o ke ākea! A a’ole hiki ke pe’e ma hope o ka la’alā’au, no ka mea, ‘o ia kahi e noho ai ka nāhesa. Ua lilo kēia i mea e uluhua ai kekahi o nā wāhine o ko mākou ‘āuna ma ka huaka’i ka’a’ōhua ‘ana i nā kūlanakauhale.

Ma ko mākou ho’i ‘ana mai, ua leka uila mai ka po’e nāna mākou i mālama me ka hō’ike mai i kahi nūhou ho’ohau’oli. Ma muli paha o ka hilahila, ua ho’ohiki kekahi o nā luna aupuni e hā’awi mai he 1000 ipu lua no ka po’e Dalit. Ma ka ho’opu’unaue ‘ana na’e, ho’okahi wale nō ipu lua kēlā no 240,000 po’e. Eia hou ho’i, ‘a’ohe wahi ‘ōlelo no ka paipu lawe ‘ino, ka paipu wai, a me ia mea aku ia mea aku e pono ai ka hana pono ‘ana o ka ipu lua e like me ka mea i kama’āina iā kākou. Mali’a o ‘eli ‘ia he mau lua hohonu ma ke kula mau’u a kūkulu ‘ia he papa ma luna o ia mau lua kahi e kūkulu ‘ia ai ka ipu lua a ‘olu’olu ai ka ‘ōku’u ‘ana. Mali’a, no ka ma’a loa o ka po’e Dalit i ka ‘ōku’u, ‘a’ole e ho’ohana ‘ia ka ipu lua. Pehea lā ka hana, he māna’ona’o ke ‘ano o ko lākou noho ‘ana a he mea ho’i ia e hū ai ke aloha.

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellence.

Haku ‘ia i Hawai’i nei

By Keao NeSmith

POSTED: 01:30 a.m. HST, Jan 29, 2011

Synopsis: To raise Hawai’i’s competitive edge, we must foster curiosity.

‘O Hawai’i nei kahi i haku ‘ia ai ka pila ‘ukulele na Nunes, do Espírito Santo, a me Dias i ka 1879. Haku ‘ia ke kīkā kila e Kekuku i ka 1880. I ka 1911, na Ginaca i haku i kekahi mīkini nāna e ‘ihi i ka ‘ili o ka halakahiki a wehe i kona ‘īkoi me ka māmā loa no ka hui mahi halakahiki. He mau mea hou aku nō he nui i haku ‘ia ma Hawai’i nei, he ‘ano pahi pelu, he noho ‘opi’opi ‘ia no ka hali i loko o kekahi paiki pa’a lima, a he mea ho’okaulike ho’i i nā huila o ke ka’a kekahi o ia mau mea. Ua lilo ka ‘oihana pili i ka pila ‘ukulele he ‘oihana he mau piliona o ke kālā, a he pila i aloha nui ‘ia ā puni ka Pākīpika nei a me nā wahi like ‘ole he nui o ke ao. Ua hele ka pila kīkā kila ā kaulana loa ma waena o nā pāna a me nā pu’ukani country a he mau piliona ke kālā loa’a ma ia ‘oihana.

‘O kekahi mau mea hou i haku ‘ia ma Hawai’i nei i kēia mau makahiki hope nei, ‘o ia ho’i, he ‘ano lina hao no ka ho’oponopono ‘ana i ka pale wāwae laholio ke hemo ke kā’awe. Ho’okomo ‘ia kēia lina hao ma ka puka o ka pale wāwae i ‘ole e hemo hou ke kā’awe. ‘O kekahi mea aku, he ‘ano kīmeki me nā ma’awe li’ili’i loa i loko nāna e hō’ike i ka pono o ke kīmeki i ke au ‘ana o ka manawa. Inā ‘oā ke kīmeki, hō’ike nā ma’awe i kahi i ‘oā ai a me kona nui. Hō’ike pū ‘ia ka nui o ke kaumaha a me ka heluna ka’a e holo ana i luna o ke alanui kīmeki.

Haku ‘ia kēia mau mea ma Hawai’i nei ma muli o ka no’ono’o nui o ka nīele i ka hana ‘ia ‘ana o nā mea like ‘ole. He mau mea nō kēia e ‘ohi ai i ke kālā ma ka miliona a me ka piliona.

Hō’ike ‘ia he mau lā aku nei ua pi’i ka nui o nā mea i haku ‘ia ma Hawai’i i ka 2010 ma mua o kekahi mau makahiki i hala ma mua. Eia nō na’e, ua hō’ike ‘ia nō ho’i i kekahi lā mai, ua emi nā ‘ai o nā haumāna kula o Hawai’i ma ka ‘ao’ao akeakamai ā nui ma mua o kekahi makahiki ma mua. Ke ho’ohālike ‘ia me nā moku’āina o ‘Amelika, aia nā ‘ai o nā hō’ike akeakamai o nā haumāna o Hawai’i kokoke i nā ‘ai o lalo loa.

Ua haku ‘ia nā mea i haku ‘ia ma Hawai’i nei ma muli nō o ke kūlana nīele i loko o ka mana’o o kēlā me kēia kanaka. Ha’oha’o ‘o ia i kekahi mea a pilikia paha a no’ono’o ‘o ia i nā ‘ano hana e hō’oi a’e ai i kona pono. ‘O kēia kūlana ha’oha’o ka mea e ho’oulu ai i loko o nā kānaka o Hawai’i nei. Pono e ho’ouna ‘ia nā kumu kula akeakamai i nā papa hana no ke a’o ‘ana i ke a’o ‘ana i hiki iā lākou ke a’o pono i ka hoihoi a me ka pono o ka nīele ‘ana no ka hana ‘ia ‘ana o nā mea like ‘ole o ke ao. ‘A’ole nō hiki ke ho’ohalahala i nā haumāna i ka emi o ko lākou mau ‘ai ma ke akeakamai. ‘Oi loa aku ka maika’i ke kōkua ‘ia nā kumu ma ke a’o ‘ana i nā ‘ano mana’o hou no ke a’o ‘ana i hiki ke a’o ‘ia kamali’i i nā mea e hoihoi ana iā lākou me ke ake e nīele a ha’oha’o nui i ka hana ‘ia ‘ana o nā mea like ‘ole. Pēlā nō ho’i e hō’oi ‘ia a’e ai ke kūlana o Hawai’i nei he wahi o ka ho’opuka ‘ia ‘ana o nā mea hou o ka honua nei. E hana ‘ia i Hawai’i nei.

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellence.

Nome ke Alahao

By Keao NeSmith

POSTED: 01:30 a.m. HST, Jan 22, 2011

Synopsis: Rail creates a Catch-22 for ancient remains.

I kēlā pule aku nei, ua pūlima ke po‘o o ka ‘Oihana Kumuwaiwai ‘Āina, ‘o William Aila, i ka ‘‘like Papa Hana o ka papa hana alahao i ho‘olālā ‘ia he $5.5 piliona ke kumu kū‘ai. Ho‘olālā ‘ia e holo ke alahao mai Kapolei a kū i ke Kikow‘na Kū‘ai o Ala Moana me ke kū pū ma ke Aloha Stadium a me ke kahua mokulele o Honolulu.

Ma ka ‘‘like Papa Hana (www.honolulutransit.com/library/default. aspx), ho‘ākāka ‘ia ka hana e hana ai ma ke kūkulu ‘ia ‘ana, ‘o ke kā‘ili ‘āina ‘ana e kūkulu ‘ia ai ke alahao, ka wehe a ho‘one‘e ‘ia ‘ana o nā kumulā‘au, a pēia pū no ke ka‘ina hana ma ka loa‘a ‘ana o nā iwi kanaka a i ‘ole ke kahua a pā pōhaku kahiko paha.

E kūkulu ‘ia ke alahao ma nā māhele he ‘ekolu a ‘ehā paha ma kona kūkulu ‘ia ‘ana mai Kapolei ā hiki i Ala Moana. ‘O kekahi ‘ōlelo i ho‘opuka ‘ia ma ka ‘‘like Papa Hana, e noi‘i ‘ia ka loa‘a o nā iwi a me nā mea kahiko mea nui ma ke ala o ke alahao ma mua o ka ho‘omaka ‘ia ‘ana o kēlā me kēia māhele o ke kūkulu ‘ana. Aia ā ho‘oholo ‘ia ‘a‘ohe mea ko‘iko‘i, a laila, e ho‘omau ‘ia ka holomua o ka hana. ‘A‘ole na‘e ‘o ka loa‘a o ka iwi a i ‘ole ka pā a kahua pōhaku paha he mea nui kūpono e ho‘opau a ho‘ohuli ‘ia ai ka holomua o ka papa hana. Pono e ko‘iko‘i loa ke kumu i ka mana‘o o ka ‘oihana kālai‘āina e ho‘opau a ho‘ohuli ‘ia ai ke ala o ke alahao.

I ke kūkulu ‘ia ‘ana o ke alaloa H-3, wāwahi ‘ia kekahi mau mea kahiko i loa‘a a hua‘i ‘ia nā iwi he nui nō a nānā ‘ia, wahī ‘ia, a wehe ‘ia no kahi ‘ē e mālama ‘ia ai. Akā na‘e, ua ho‘ohuli ‘ia nō kekahi hapa o ia alaloa ma muli o ka ‘mea nui’ o kekahi kahua a pā pōhaku paha i loa‘a i ka holomua ‘ana o ke kūkulu ‘ia ‘ana o ia alaloa.

Akā na‘e, ma ka ho‘oholo ‘ana e holomua ke alahao ma hope o ka noi‘i ‘ana ma mua o kēlā me kēia māhele o ke kūkulu ‘ana, he hiki i ke Kūlanakauhale a me ke Kalana o Honolulu ke paio ua lilo ‘ē ke kālā no kēia papa hana a ua pa‘a loa ke ala i ho‘olālā ‘ia no ke alahao a he mea ‘ole ka mea i loa‘a ma ka honua, no laila, e wāwahi ‘ia nā pā me nā kahua kahiko e loa‘a auane‘i a e wehe ‘ia nā iwi e loa‘a a he hiki ‘ole ke ho‘opau a ho‘ohuli ‘ia paha ke alahao.

‘Ōlelo kekahi po‘e kāko‘o i ke alahao e kūkulu ‘ia ma luna a‘e o ka ‘ili honua, no laila, ‘a‘ohe wahi pō‘ino e ‘ike ‘ia i nā mea kahiko ma lalo o ka honua. Eia nō na‘e, ma ke kūkulu ‘ia ‘ana o ke alahao, pono e pao ‘ia ka honua no ka ho‘omoe ‘ana i nā paipu lawe ‘ino a me nā uea uila a kelepona paha ā moe pū me ka holo o ke alahao. No laila, me ka pai ‘ia nō o ke alahao ma luna a‘e o ka ‘ili honua, ‘oia mau nō e hu‘e ‘ia ka lepo a ho‘opō‘ino ‘ia nā mea loa‘a ma lalo.

‘O ka pololei, pono e noi‘i ‘ia nā mea a pau ma mua o ka ho‘omaka ‘ana i ka hana i hiki ke ho‘ololi ‘ia ka papa hana ke pono; ‘a‘ole e hana ma ka māhele. ‘A‘ohe mea hiki ke hana ‘ia e mālama ai i nā mea kahiko inā pēlā. E nome ‘ia nō e ke alahao.

E ho‘ouna ‘ia mai nā leka iā māua, ‘o ia ho‘i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai‘i at Mānoa, supported by the Initiative for Achieving Native Hawaiian Academic Excellence.

Ola Kākou iā Kākou

By Keao NeSmith

POSTED: 01:30 a.m. HST, Jan 15, 2011

Synopsis: What we do to the environment affects our way of life.

Ke ‘ike nei ko Hawai’i po’e i ka loli o ka noho ‘ana ‘o ia lā aku ‘o ia lā aku. Ma ka ho’ohālike aku me ‘umi mau makahiki aku nei, ua loli maila kekahi mau hana ma’amau a kākou, ‘o ia ka waewae ‘ana i ka ‘ōpala, ‘o ke kini ‘oe, ka ‘ōmole ‘oe, ka pepa ‘oe, ‘o nā mīkini pū nō ho’i. ‘Oi aku ka nui o nā hana o kēia ‘ano i paipai ‘ia ma nā ‘āina like ‘ole, e like me Nukilani, ma ka ho’ēmi ‘ōpala ‘ana, e like me ka waewae ‘ana o ko kēlā me kēia hale i ka pepa a me ka ‘ea. He kanu māla ‘ai nō ho’i kēlā me kēia ‘ohana e hānai ai i ka ‘ohana. ‘A’ole nō pēlā ma Hawai’i nei, akā, pono nō.

Kanakolu mau makahiki aku nei, ‘a’ole i no’ono’o ‘ia ka waewae ‘ia ‘ana o ka ‘ōpala ma Hawai’i nei. He pono kiola nō ka hana i luna o ka pu’u ‘ōpala a waiho na ke kakapila e kanu ma ka honua. Pau ka ‘ike ‘ia, pau pū ka no’ono’o ‘ia. Ma kekahi mau wahi, e like me Mānā ma Kaua’i, ‘o ka pu’u ‘ōpala ka pu’u ki’eki’e loa o ia ‘āina kula pālahalaha a ua lilo he kilohana e nānā aku ai ā lō’ihi ma kēlā me kēia ‘ao’ao.

I ka holo ‘ana o nā makahiki, ea mai nā mana’o nāna e kōkua i ka pono o ka ‘āina i ‘ole e pau loa i ka ho’ohaumia ‘ia e kānaka. ‘O ka maka’u, ‘o ia ka haumia pū o ka ‘āina ā hiki ‘ole ke noho ‘ia e kānaka.

Ke ho’ohālike aku me nā ‘āina ā puni ke ao, ‘o ke kumu kū’ai o ke kakalina ma Hawai’i nei kekahi o ke kumu kū’ai emi loa. Ma Nukilani, he $6.15 ke kumu kū’ai o ke kakalina o ke kālani i kēia manawa. Ma kekahi mau ‘āina hou a’e, ‘oi aku ka pipi’i. Ma Honolulu, he $3.70 o ke kālani i kēia wā. No laila, ‘o wai ke pono ke namunamu?

Ma muli nō o ka pi’i o ke kumu kū’ai o ke kakalina o kēia mau makahiki hope nei i loli ai ka mana’o o kekahi hapa o ka lehulehu e kū’ai i nā ka’a emi o ke kino a makauli’i o ke kālā. ‘O kekahi hopena i ‘ike ‘ia ma ia hope mai, ua pau kekahi mau hui kū’ai ka’a o Honolulu nei. Maika’i kekahi mau loli ‘ana a ‘a’ole paha maika’i kekahi.

Pehea kekahi loli ‘ana? Huli ka no’ono’o o kekahi mau hui mahi kō kahiko e ho’oulu i kekahi mau ‘ano lā’au e ho’olilo ‘ia ai he ‘aila nāna e ho’oholo i ka uila o nā kūlanakauhale a no nā ka’a pū, e like me ka hui ho’oulu kūlina hō’e’epa ‘ia a me ka lā’au albizia ma Kaua’i.

‘O kekahi hopena e maka’ala ai ma ia hana, ‘o ia ho’i, he lā’au malihini a hana ‘ino ka albizia i ka ululā’au. He laha hikiwawe, he ulu wawe he 20 kapua’i o ka makahiki ho’okahi. He 120 kapua’i ka palena lō’ihi e ulu ai. He ho’omalumalu i ka nāhelehele a make nā lā’au ‘ōiwi he nui e like me ka ‘ōhi’a. Pouli pū nā ‘eka he 3,000 a ‘oi ma Kaua’i i ka ulu albizia i kanu ‘ia. He mau kaukani hou aku nā ‘eka i uhi ‘ia e ka albizia i laha na ka makani. ‘Akahi nō ka ‘ike ‘ia o ka puehu o ia lā’au i luna nō o ka piko o Kawaikini he 5,000 kapua’i i luna o ka lani. Puhi ‘ia kona ‘ano’ano na ka makani a me nā manu ā laulā loa.

I kekahi lā, ke pau kēia mau hui ho’oulu lā’au, he aha ana ka hopena? E wehewehe ‘ia ana kēia mau lā’au e ko ia mau hui i ‘ole e ulu hou? ‘A’ole nō paha.

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellence.

Ha’alipo a Ho’omana’o a’e

By Keao NeSmith

POSTED: 01:30 a.m. HST, Jan 08, 2011

Synopsis: January is a solemn month of reflection in Hawai’i — even a hundred years later.

Ma Ianuali o ka 1887, ua ho’okumu ‘ia ka hui malū, ‘o ke Ku’ikahi Hawai’i, he hui kumakaia i ke Aupuni Mō’ī Hawai’i, ‘o ko lākou kumu, ‘o ia ka ho’okahuli ‘ana i ke Aupuni Mō’ī me kona ho’ohui ‘ia ‘ana me ‘Amelika Hui ‘ia. ‘O Lorin Thurston ka mea nāna i kākau i ka palapala ho’okumu o ia hui.

‘O ka po’e lālā o ua hui nei, he po’e kupa ‘Amelika, he po’e kupa o nā ‘āina ‘ē, he po’e kupa Aupuni Mō’ī ‘ili ke’oke’o, a me kekahi po’e kānaka he hapa koko Hawai’i. He po’e lālā nō ho’i kēia po’e o ka ‘ao’ao polikika ‘o ka ‘Ao’ao Mikiona, ‘o ia ka ‘ao’ao polikika e paipai ana i nā mana’o o nā mikiona Kalikiano hō’ole pope. ‘O kekahi inoa kapakapa no ia hui malū, ‘o ia ‘o ka Hui Ho’ohui ‘Āina no ka ‘i’ini o kona mau lālā e ho’ohui ‘ia ke Aupuni Mō’ī me ‘Amelika Hui ‘ia.

Ma Iune o ka 1887, ua hui malū ka Hui Ho’ohui ‘Āina me ka Hui Laipela o Honolulu, he hui ia o nā hoa e pa’a ana i nā pū e kōkua ai i nā hoa o ka ‘Ao’ao Mikiona ke hihia lākou ma kekahi ‘ano. Naue pū lākou me nā pū a ho’okikina i ka Mō’ī Kalākaua e pūlima i ke Kumukānāwai ‘Ēlau e ho’ēmi ai i ka mana o ka Mō’ī i ‘ole ‘o ia e ke’ake’a i nā hana kālai’āina a ia hui. Lilo he mea ‘ole ke Kumukānāwai ‘Ēlau no ke kō ‘ole o ke kumukānāwai kumu.

Iā Lili’uokalani e noho ali’i ana, ua hana koke ‘o ia e ho’oponopono i ke Kumukānāwai e ho’oikaika hou ai i nā mana o ka Mō’ī. Naue hou nā kumakaia e kipi kū’ē i ke aupuni. Ea maila ke Kōmike Palekana he ‘umi kumamākolu ona mau lālā no ka ho’okahuli ‘ana i ke aupuni o Lili’u. Ma ka lā 17 o Ianuali o ka 1893, hui pū ke Kōmike Palekana, ka Hui Ho’ohui ‘Āina, ka Hui Laipela, kekahi mau hoa kōkua, Sanford Dole, ke Kuhina ‘Amelika John Stevens, a me ka pū’ali ‘Amelika me nā pū i ho’opae ‘ia a naue pū lākou ā ka hale ali’i ‘o ‘Iolani a ho’okahuli i ke aupuni o Lili’uokalani.

He minamina nui ka ho’okuke ‘ole ‘ia ‘ana o nā kipi he mau makahiki ma mua aku. Eia kā, ho’omana’o mau ‘ia kēia mau kumakaia ma ke kapa ‘ia ‘ana o nā alanui o Honolulu ma muli o lākou.

I ‘ike ka lehulehu, eia ka helu ‘ana o nā inoa o nā alaka’i kipi a kumakaia: Henry E. Cooper, Crister Bolte, Andrew Brown, William R. Castle, John Emmeluth, Theodore F. Lansing, John A. McCandless, Frederick W. McChesney, William O. Smith, Lorrin A. Thurston, Edward Suhr, Henry Waterhouse, William C. Wilder, Charles L. Carter, Samuel M. Damon, Sanford B. Dole, Peter C. Jones, James A. King.

He kama’āina nā kupa o Honolulu nei i kekahi o kēia mau inoa, no ka mea, ho’omaopopo mau ‘ia kākou i kēlā lā me kēia lā i ka holo ma ke alanui i kēia mau inoa. He mau alanui ma Honolulu nei i kapa ‘ia ma muli o kekahi o kēia po’e kānaka o ke kuko ‘ino a puni koko. Ua lilo kā kēia po’e he hi’ona o ko kākou ‘āina. Ua ho’olilo ‘ia pēlā a hiki ke ho’olilo hou ‘ia a pono hou a’e. Pā mai, pā mai, pā ka makani o Hilo.

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellece

Ke ola o ka manō i ka Pākīpika

By Laiana Wong

POSTED: 01:30 a.m. HST, Dec 25, 2010

Synopsis: Hawaii state Sen. Clayton Hee, in his fight to save the shark population in the Pacific, has been helping the Guamanian legislature to pass a similar bill to the one he authored here in Hawai’i.

Aloha Kalikimaka mai nō kākou e nā makamaka o Kauakūkalahale. Pehea lā ke ‘ano o ko kākou ho’omana ‘ana, he wā maika’i nō kēia e hō’ike ai i ko kākou ‘ao’ao aloha a me ka menemene ho’i i ko kākou mau hoa mea ola o ka honua nei, a ‘o ka manō pū kekahi. He mea ma’amau nō kona hō’ike ‘ia ma loko o nā ki’i’oni’oni ma ke ‘ano he mea ‘ino nāna e pepehi wale mai i ke kanaka ke komo aku ma loko o kona alahula ‘o ke kai, a he koe aku ia ka ‘oia‘i‘o a me ka ‘ole o ia mana’o, eia na’e, ‘a’ole ia ‘o ke kumu e pepehi nui ‘ia nei ma waena o 79 a me 90 miliona manō i kēlā me kēia makahiki. ‘O ka hapanui loa o ia po’e manō, ua maopopo, eia ke pepehi ‘ia nei no kona lā i mea e hana ai i ke kupa lā manō.

Ua ‘ike ‘ia kēia pilikia ma Hawai’i nei, a no ka hāpai ‘ia e ke Kenekoa Clayton Hee o kekahi pila nāna e mālama i ka pono o nā manō ma o ka pāpā ‘ana i ka hō’ahu ‘ia o kona mau lā ma loko o nā hale’aina, ua ne’e wale nō ia ‘oihana ma kahi ‘ē. Aia nō ma Guam i kēia manawa. A pehea lā e ō ai ka lāhui manō inā he 70 a 90 paha miliona ka nui e pepehi ‘ia nei i loko o ka makahiki ho’okahi? Ua kau palena ‘ia ka nui o nā manō o ka moana a ‘a’ole nō e like ka wikiwiki o kona ho’oulu ‘ana i kona lāhui me ka wikiwiki o kona pepehi ‘ia ‘ana. ‘A’ohe nō a he wā, e nalo loa ka lāhui manō a e like aku kona kūlana halapohe me ka nalala. A i mea aha e nalo ai. ‘A’ole no ke ola o kānaka ke hele aku ma loko o ke kai. ‘A’ole ho’i no ka hānai ‘ana i ke kanaka ke hele aku i ka hale’aina. ‘O ka po’e waiwai wale nō ke ‘ai nei i ke kupa lā manō a ‘a’ole paha lākou e make pōloli i ka ho’okē ‘ana i ia mea ‘ai ho’okahi wale nō. He mea wale nō e pi’i ai ko lākou kūlana ka ‘ai ‘ana i ia mea e hiki ‘ole ai i ka po’e nele a ‘ilihune ke ‘ai. ‘A’ole nō ia he mea e ola ai ka lā pōloli. E aho nō paha ka puhi ‘ana i ke kālā i ke ahi i mea e hō’ike ai i ka waiwai o ke kanaka. Pēlā nō e mālama ‘ia ai ka manō.

A ‘o ia nō ke kumu i hele ai ke Kenekoa Hee i Guam. He nui nō nā lā manō e ho’okomo ‘ia nei ma laila no ka pāpā ‘ia o kona ho’okomo ‘ia ma Hawai’i nei i kēia manawa. Ua mana’o ke Kenekoa Hee e ho’opau i kēia hana māinoino a kohu ‘ole ho’i ma loko o ka Pākīpika. He hana kālā wale nō ia e loa’a ai kahi kenikeni i ka pakeke o ka po’e lawai’a. ‘A’ole ia he mea e pono ai ke olakino i ka ‘ai a malu ai paha ke kanaka i ‘ole e pepehi ‘ia. A no laila, e aho paha ka ‘imi ‘ana o ia po’e lawai’a i i’a hou aku e lawe ai mai loko mai o ke kai. E ‘oi aku ana ka waiwai no ke olakino a e hapa mai ana ke emi ‘ana o ka manō. Pēlā e mālama ‘ia ai ka pō’aiawaiwai o ke kai. E ‘ai kākou i ka mea e ola ai ke kino, ‘a’ole ka mea e pi’i ai ke kūlana. Mahalo i ke Kenekoa Hee i kona paio ‘ana no ka pono o ka manō.

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellence.

Aloha e na lehulehu o Molokai nui a Hina!

Sun, December 19, 2010

Aloha e na lehulehu o Molokai nui a Hina!

He leo mahalo palena `ole keia i na kokua i kokua ia makou i ka makou hana keaka `olelo Hawaii “Ka La Hanau o Iesu.” Mahalo ia Po`okumu Lydia Trinidad no ke kako`o mau `ana ia makou i ko makou papahana. Mahalo pu makou ia `Anakala Mike Sabas a me kana hui ma Maui Parks and Recreation no ka `ae `olu`olu `ana ia makou e ho`ohana i ka hale kaiaulu`o Mitchell Pau`ole.  Nui ke aloha i na makua, kupuna, `ohana kekahi i kokua me ka lole, ka lei, ka pena`ana, ka ho`onaninani `ana i ke kahua, ke kukui a me na mea `e a`e e pono ai no ka hana keaka – `a`ole he hana nui ke alu `ia! Mahalo, mahalo mahalo.  A i  ka Hui Makua no ka ho`omakaukau `ana i ka mea `ai i ku`ai aku `ia – na `ohana i ha`awi manawale`a – ke aloha pau`ole. Na makou,

Contributed by Molokai Dispatch, for more information, Click here Read the full story

‘Ohu‘ohu ka Hale Ali‘i

By Keao NeSmith

POSTED: 01:30 a.m. HST, Nov 27, 2010

Synopsis: ‘Iolani Palace lights it up for the season.’Auhea ‘oukou e ka hū me nā kini e heluhelu mai nei, Aloha nui ‘oukou: He mahina ho’ohau’oli nui ‘o Nowemapa ma ke Aupuni Mō’ī nei me ka ho’owehiwehi pū ‘ia mai o ka Hale Ali’i ‘Iolani ā ‘ohu’ohu i ka hae welo ha’aheo o ke kalaunu me ke aupuni pū. ‘Elua nō kumu nui e kīhe’ahe’a ‘ia ai ka poli o nā lālani ali’i a me nā maka’āinana pū i ka ha’aheo me ka hanohano i kēia malama: ‘O ka mua, ‘o ia ka lā hānau o ka Mō’ī Kalākaua, ke kilo lae’ula a kuhikuhipu’uone nāna i wānana i ka pono o ka ho’opa’a a kūkulu ‘ia o nā mea hanohano o nēia aupuni nani e hāhā lima maoli ai nā aloha ‘āina o kēia au holomua o kākou me ka makahehi pū, ‘o ia ‘o ka Hale Ali’i ‘Iolani a me ke ki’i o Ka Na’i Aupuni Kamehameha e kū kilakila nei i mua o Ali’iōlani Hale. ‘O ka lā ‘umi kumamāono o Nowemapa nei kona lā hānau a ‘o ia ke kumu nui i ho’owehiwehi ‘ia ai ka Hale Ali’i ā ‘ohu’ohu nā o’a a me nā hūlili mai kēlā kihi a kēia kihi o ka hale o ka ‘, ka Mahi, me ka Palena o Honolulu Kaona.

No laila, he ho’omaika’i kēia i ka Lani me nā hūlō nui, i ka Mea ho’i e ‘a’ā mau ai ka lamakū ma luna konu o ka lāhui aloha o ka pae moku nei, ‘o ia ka lāhui o ka pupu’u ho’okahi, nā ēwe koko me nā kupa pū nō i ho’okupa ‘ia a ku’i i ka iwihilo.

‘O ka ‘elua o ka mea e ho’owehiwehi ai i ka poli o nei lāhui i ka ho’ole’a anoano a kamaha’o, ‘o ia ka lā i ala ai nā aupuni o nā ‘āina ‘ē, ‘o Pelekānia Nui, ‘o Palani, a me ‘Amelika Hui ‘ia, a ho’ohiwahiwa mai i ko kākou aupuni aloha nei i ka ‘ae me ka ho’omaika’i mai ma ka palapala ku’ikahi i ko kākou kūlana kū’oko’a, aia i ka lā iwakālua kumamāwalu o Nowemapa. ‘O ka lā hānau nō ia o ko kākou Aupuni Mō’ī o ke ‘ano hou o kēia au. He ‘umi kumamāhā mau aupuni hou a’e i ho’ohui pū mai i ko lākou leo ho’omaika’i i ka ho’opa’a ku’ikahi mai me ko kākou nei Aupuni Mō’ī. ‘O ke kumu nō ia e ho’olaule’a ai ko ke Aupuni Mō’ī nei me nā hūlō nui me ka pulelo ‘oli’oli pū o ka hae ke’oke’o, ‘ula’ula a uliuli ma ka lā iwakālua kumamāwalu o nei malama. E ‘ole loa kākou e poina!

I loko o Kēkēmapa e ne’e koke mai nei, e kuikui ‘ia nā kukui poepoe he ‘alani a ‘ōma’oma’o ka waiho’olu’u ma ka pā o ka Hale Ali’i ma ka ho’olaule’a ‘ana i ke kau ‘oli’oli o ke Kalikimaka me ke pani ‘ia ‘ana o ka makahiki. ‘O ka hana nō ia a ka Lani La’amea e ho’ohau’oli ai ā lana ka houpo o ka lāhui.

E paipai pū kākou i Nā Hoa o ka Hale Ali’i ‘Iolani e ho’onaninani mau i ka Hale Ali’i i nā wehi nani i kēlā me kēia lā nui o ke Aupuni nei, ‘o ia ka lā ‘umi o Ianuali, ‘o ia ka lā hānau o ke Keiki Ali’i ‘o Leleiohoku; ‘o ka lā ‘umi kumamākahi o Iune, ‘o ka lā ho’ohanohano no Kamehameha Pai’ea, hui pū nō me nā lā nui o Nowemapa, ‘o ia nā lā nui o ke Aupuni Mō’ī Hawai’i. E ho’omana’o a ho’āno nō kākou i kēia mau lā, ‘o ia ka ho’oilina o kākou, nā kupa. ‘A’ohe nō li’uli’u a he ‘ō’ili mai koe ka lā i luna o kākou a mōakāka loa nā hi’onaina a pau loa.

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
»956-2624 (Kekeha)
This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellence.

***********************************************************************

E kū ka lau lama!

By Laiana Wong

POSTED: 01:30 a.m. HST, Nov 20, 2010

Synopsis: It is time to celebrate! Kauanoe Kamanā has successfully defended her dissertation at UH-Hilo as three other Hawaiians are poised to defend their dissertations at Mānoa.

Aloha e nā makamaka o ka ‘ōlelo kanaka.

Hūlō! Hūlō!

E kū ka lau lama!

‘Akahi nō a ku’i mai ka lono ho’ohau’oli no ka ho’okō ‘ana a Kauanoe Kamanā i nā koina a pau e pono ai kona ho’ohanohano ‘ia ma ka pāpahi ‘ia mai i ke kekelē lae’ula ma ke Kulanui o Hawai’i i Hilo. I ka Pō’akolu nei. Kūpale akula ‘o Kauanoe i kāna pepa nui nona ke po’o inoa: “Mo’oki’ina ho’oponopono: Ke ō o ka ‘ike ku’una Hawai’i ma ke kula ‘o Nāwahīkalani’ōpu’u.”

Eia ho’i mākou, nā luna o Kauakūkalahale, ke hā’awi aku nei i ko mākou aloha a me ka mahalo nui i ko ia ala ho’omanawanui i ka ho’okō ‘ana i ia mau ha’awina a puka mai ai ho’i i ke ao mālamalama.

He kekelē kēia ua pili nō i ka ho’ōla ‘ana i nā ‘ōlelo a me nā loina o nā po’e ‘ōiwi o ke ao nei a puni.

He mea nui ko’ikoi ka noi’i ‘ana i nā ‘ike a me nā mea huna no’eau o ia māhele me ka ho’opuka ‘ia aku i mua o ke ākea.

Pēlā nō e ola ai nā ‘ōlelo a me nā loina o ka po’e ‘ōiwi a pōmaika’i ai ho’i kākou a pau.

He au hou kēia no ka ho’ona’auao ‘ia ‘ana o ka po’e Hawai’i a ke ‘ike ‘ia nei ka waiwai o ke ki’i ‘ana i nā kekelē ki’eki’e ma nā kulanui.

Eia ke māhuahua nei ka nui o ka po’e Hawai’i nāna e kūlia i ia nu’u ‘o ke kūlana kauka hua palapala. Eia nō ho’i ma ke Kulanui o Hawai’i i Mānoa he mau moho hou aku nāna e ho’omākaukau nei, me ke ku’upau lua i ka ikaika no’ono’o, no ke kūpale i kā lākou mau pepa nui.

A iā ‘oukou nō e heluhelu nei i kēia kolamu (i ka Pō’aono), ua mālama ‘ē ‘ia ke kūpale ‘ana (ma ka Pō’alima nei) a ua maopopo ka hopena o ‘elua o ia mau kūpale ‘ana. A i loko o ‘elua pule ma kēia hope aku nei, e kūpale ana ke kolu o ia ‘āuna.

‘O Kekeha Solis kekahi o ua po’e moho nei a ‘o ka inoa o kāna pepa, penei:

“Ma ka waha wali

(A ke kino lahilahi.

Ma ke kino lahilahi)

A ka waha wali.”

He pepa nui kēia e pili ana i ka ho’ōla ‘ana i nā ‘ōlelo no’eau a puka hou aku ma ka waha e like me ma mua.

‘O Keawe Lopes kekahi moho a ua hō’ili’ili ‘o ia i nā mele he nui a lehulehu a me kahi ‘ike e pili ana i ua mau mele lā. Ua kapa ‘ia kāna pepa: “Ka waihona a ke aloha: An interactive resource center for the promotion, preservation and perpetuation of mele.”

A ‘o ke kolu o ia ‘āuna, ‘o ia nō ‘o Ipo Wong. Ua kākau ‘o ia e pili ana i ka ho’oili ‘ana i ka ‘ike o ka po’e Ni’ihau mai kekahi hanauna a i kekahi, a ua kapa ‘ia ka inoa o kāna pepa: “Ke ao ana mai i ka ike o na kupuna i loko o ka nohona Niihau.”

Mahalo a nui iā ‘oukou a pau no ka ho’omanawani ‘ana i ka ho’okō koina, ka paio ‘ana no ka pono o ka po’e Hawai’i, a me ka lilo ‘ana i kumu ho’ohālike no kākou a pau e ho’omāhu’i ai.

E mau aku ka māhuahua ‘ana o ka po’e Hawai’i e ‘imi nei i kekelē lae’ula.

‘O ia ka mea e kū hou ai ka lāhui i ka moku.

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellence.

www.staradvertiser.com > Columnists > Kauakukalahale > Liana Wong

***********************************************************************
He pilikino ke olakino

By Ruth Wong

POSTED: 01:30 a.m. HST, Nov 13, 2010

Synopsis: Western remedies are highly intrusive both physically and psychologically and are generally unattractive to many Hawaiians.

Aloha mai nō kākou e nā pilikana o ke ēwe ho’okahi. He wahi mana’o ko’u e waiho aku ai i mua o ‘oukou no ka lapa’au ‘ana a ka po’e haole, he hana e ‘ano ‘ē ai ka na’au o ka Hawai’i.

‘Ekolu mahina aku nei, no ka ‘eha loa o ko’u kā i ka lawelawe ‘ana i nā hana palupalu o kēlā lā kēia lā e la’a ka hele wāwae, ka ‘ōku’u, ka pi’i alapi’i, a pēlā aku, ‘o ke komo akula nō ia ma ka haukapila e kaha ‘ia ai ko’u wāwae no ka ‘oki ‘ana i ka iwi kā a me ka ho’okomo ‘ia o ka hao ma kahi o ua iwi nei. Humuhumu ‘ia ka ‘ili a pa’a, a i ka polapola ‘ana na’e, loa’a honua maila nō au i ka ma’i palahēhē ma kahi o ua hao nei i komo ai. ‘O ko’u ho’i akula nō ia a komo hou ma ka haukapila, a ma laila i waiho ai i ka moe no ‘umi lā. ‘O ka ho’omanawanui hou nō ia i ka nohona haukapila.

‘O kekahi ‘ōlelo ‘ana no ia wahi, ‘o ia nō ka “hale ma’i”, no ka mea, ma laila e lapa’au ‘ia ai ka po’e ma’i. Ua lohe na’e au i ka ‘ōhumuhumu a kekahi po’e ē ma ka hale ma’i nō e loa’a ai kekahi po’e i ka ma’i. No’u iho, ua pololei paha kēlā mana’o, no ka mea, ma ko’u komo hou ‘ana nō i ka hale ma’i no ka mālama ‘ana i kēlā ma’i palahēhē ma ko’u iwi kā, ua ma’i hou nō. ‘O ia ho’i, no ko’u lapa’au ‘ia me nā lā’au pepehi mūhune ikaika loa, mai pau ka pono a ko’u haku’ala a ua emi mai ho’i nā hunaola ‘ula’ula o ko’u koko. Hele a nāwaliwali loa ke kino a ‘a’ohe wahi ‘eu i koe. No’ono’o ihola au i loko o’u i ko’u hopena ‘elemakule. Aloha nō! A i loko nō o ia mau ha’awina ho’okaumaha, ua ho’omanawanui au a hiki i ka ho’i ‘ana mai o ko’u haku’ala a kona kūlana ma mua, a ua ho’oku’u ‘ia mai au no ka ho’i aku i ko’u hale pono’ī, kahi e pakele ai i nā ma’i o ka hale ma’i.

Mahalo nō au i ka hana a nā kauka. Ua hana nō lākou e like me ka mea e pono ai. ‘O ka’u na’e e ‘ōhumuhumu ai, ‘o ia nō ka nīele a me ka maha’oi o nā limahana o ka hale ma’i. I kēlā lā kēia lā, ‘a’ole nō i nele ko’u nīele ‘ia no ke kūlana o ko’u ola kino. ‘A’ole o’u mana’o e kaena i ke ola hou ‘ana o pilikia auane’i, a ‘a’ole hiki ke pane aku i ka pupuka o huikau auane’i lākou.

Eia hou, ua nui ko lākou nīele i ke kūlana o ka ‘eha. Eia ke ‘ano o ka nīnau: Pehea ka ‘eha – mai ka ‘ekahi a ka ‘umi? Hana nui ka pane ‘ana i ia ‘ano nīnau. He aha lā ia mea he helu? He aha ho’i kona mana’o? ‘A’ohe wahi ‘ike o laila. ‘O ka ‘oia’i’o, ‘a’ole wahi ‘olu’olu o ke kino a ‘a’ole na’e i lawa ka ‘eha e kahe ai ka waimaka a uī ai ho’i ka niho. Eia hou ho’i, nui ko lākou ‘i’ini e ‘ohi i ko’u mimi a me ko’u kūkae i wahi e kilo ai i ke ‘ano a me ke kūlana o ka ma’i. Pehea lā kēlā ‘ano? ‘Ano ‘ē ko’u na’au i ka hā’awi wale aku i ia mau mea pilikino i ka malihini. He aha lā kāna e hana ai? ‘O ia mau hana maha’oi nō paha ke kumu e hele ‘ole nei nā Hawai’i i ke kauka. A ‘o ia nō paha kekahi kumu i pilikia ai ko kākou olakino.

E ho’ouna ‘ia mai nā leka iā māua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai’i at Mānoa, supported by the Initiative for Achieving Native Hawaiian Academic Excellence.

*****************************************************************************

A‘o i ke koa

By S.L. No‘eau Warner

Nov 06, 2010

Synopsis: Nä Koa o Änuenue football braves another exciting season with speed and running.

E ö e nä Koa! He wahi leo mahalo këia i nä Koa, ‘o ia ho’i nä keiki ‘ölelo kanaka me kä läkou mau ka’i o ke Kula Kaiapuni ‘o Änuenue, no ko läkou ‘eleu ma ke kau kinipöpö peku wäwae ‘akahi a hala me ka ‘auamo pü aku i ke kuleana ko’iko’i o ka ho’omau ‘ana i ka leo kanaka ma ke kahua pöpeku.

I loko nö o ka helu iki, he 24 wale nö keiki o ka hui, ‘a’ole i kana mai ka hahana o kä läkou paio ‘ana. He mau keiki pu’uwai hao kila nö! A ua lilo mai he 3 eo i nä Koa me ke ka’a aku he 5 eo i nä hoa päonioni o ka Pae Kea o ka OIA.

He mea maopopo, ua a’o ‘ia nö e nä Koa ia mau mea ‘o ke koa a me ka holo, e like me ka ‘ölelo a kahiko. Ua koho na’e läkou i ka holo i mua wale nö, ‘a’ole i hope.

A ma nä ho’okükü 8 o ke kau pöpeku maoli o ka Pae Kea, lilo a’ela ‘o Ikaika Gante o nä Koa ‘o ia ka helu ‘ekahi o nä mea halihali pöpö. ‘O ka heluna nui o nä ‘ïä holo a Gante, he 1,263. Ua uhai koke ‘ia mai e Jesse Carney o Kaläheo (1,257 ‘ïä) a me Victor Moananu (1,245) o Waipahu.

Eia na’e ka mea kupanaha. ‘O kä Gante mau ‘ïä holo, no loko mai nö o nä ho’okükü he 7 wale nö, a ‘o kä Carney me kä Moananu, no loko mai nö o nä ho’okükü he 8!

A no ke kumu mai ho’i, ua käpae ‘ia ko Änuenue ho’okükü me Kaimukï no ka nui o nä Koa i ‘eha a i ‘öma’ima’i ho’i.

A ‘oiai ua komo ‘o Carney mä ma nä ho’okükü wae moho o ka Pae Kea, ‘akahi nö läua a ka’a i mua o Gante ma ka nui o nä ‘ïä holo. I loko na’e ia o nä ho’okükü he 9!

Ma ke ‘ano he kime, puka maila nä Koa ma ka helu ‘ekolu ma nä ‘ïä holo he 2,217 (Pae Kea, OIA). ‘O Kaläheo kai puka mai ma ka helu ‘ekahi o nä ‘ïä holo he 2,559. Inä na’e i komo ‘o Änuenue i ka ho’okükü me Kaimukï, inä paha ua puka mai läkou ma ka helu ‘ekahi. Akä, he nui nä ‘ina o ke kai!

A mahalo ho’i i nä Koa halihali pöpö ‘ë a’e. Mai luna a lalo, na La’akea Mano’i-Hyde i holo he 315 ‘ïä. Na Kamea Kahiapo he 299 ‘ïä, na Makamae Otani-Wengler he 177, na Mahuka Cullen he 99, na Kainoa Keli Nähaku he 29, na Käkela Lee he 15, na Makana Fernandez he 14, na Kealoha Smith he 10, na Pono Kahili he 8, na ‘maikalani Keama a me Hemakana Yam-Lum he 3, me Käpena Robinson he 1.

A he mahalo nui i nä keiki o ka laina külele näna i palaka a wehe a’e i nä ala mäla’ela’e e holo aku ai. ‘O ho’i ‘o Wilioho Ka’awa, Iokepa Waiwai’ole, La’amaikahiki Kamai, Kealoha Smith, Kaho’oipo Ancog-Mossman, Pono Vegas me ‘Ölino Kaleopa’a, pau pü me nä muku, ‘o ‘maikalani Keama a me Makana Fernandez. E ‘ole läkou, holo kikï ai ‘o Gante mä.

A mahalo ho’i iä Kamalei Ka’awa, Keapolani Palmeira Beamer, Kahöküwelo Kaleimamahu, me Kawa’a Kahana-Reid i komo pü aku i ka hahana o ka paio ‘ana. ‘A’ole e nele ko läkou pä’ani nui ‘ana i këia makahiki a’e!

He leo aloha a mahalo ho’i këia iä läkou päkahi a pau! A pëlä ho’i iä Ka’i Kealohamakua Wengler a me nä ka’i ‘ë a’e a pau!

Ha’aheo ko O’ahu me ko Hawai’i a puni iä läkou!

E ho’ouna ‘ia mai nä leka iä mäua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)

This column is coordinated by the Hawaiian Language Department at the University of Hawai’i at Mänoa, supported by the Initiative for Achieving Native Hawaiian Academic Excellence.

www.staradvertiser.com > Columnists > Kauakukalahale > S.L.No ‘eau Warner****************************************************************************

Synopsis: Nä Koa o Änuenue football braves another exciting season with speed and running.

E ö e nä Koa! He wahi leo mahalo këia i nä Koa, ‘o ia ho’i nä keiki ‘ölelo kanaka me kä läkou mau ka’i o ke Kula Kaiapuni ‘o Änuenue, no ko läkou ‘eleu ma ke kau kinipöpö peku wäwae ‘akahi a hala me ka ‘auamo pü aku i ke kuleana ko’iko’i o ka ho’omau ‘ana i ka leo kanaka ma ke kahua pöpeku.

I loko nö o ka helu iki, he 24 wale nö keiki o ka hui, ‘a’ole i kana mai ka hahana o kä läkou paio ‘ana. He mau keiki pu’uwai hao kila nö! A ua lilo mai he 3 eo i nä Koa me ke ka’a aku he 5 eo i nä hoa päonioni o ka Pae Kea o ka OIA.

He mea maopopo, ua a’o ‘ia nö e nä Koa ia mau mea ‘o ke koa a me ka holo, e like me ka ‘ölelo a kahiko. Ua koho na’e läkou i ka holo i mua wale nö, ‘a’ole i hope.

A ma nä ho’okükü 8 o ke kau pöpeku maoli o ka Pae Kea, lilo a’ela ‘o Ikaika Gante o nä Koa ‘o ia ka helu ‘ekahi o nä mea halihali pöpö. ‘O ka heluna nui o nä ‘ïä holo a Gante, he 1,263. Ua uhai koke ‘ia mai e Jesse Carney o Kaläheo (1,257 ‘ïä) a me Victor Moananu (1,245) o Waipahu.

Eia na’e ka mea kupanaha. ‘O kä Gante mau ‘ïä holo, no loko mai nö o nä ho’okükü he 7 wale nö, a ‘o kä Carney me kä Moananu, no loko mai nö o nä ho’okükü he 8!

A no ke kumu mai ho’i, ua käpae ‘ia ko Änuenue ho’okükü me Kaimukï no ka nui o nä Koa i ‘eha a i ‘öma’ima’i ho’i.

A ‘oiai ua komo ‘o Carney mä ma nä ho’okükü wae moho o ka Pae Kea, ‘akahi nö läua a ka’a i mua o Gante ma ka nui o nä ‘ïä holo. I loko na’e ia o nä ho’okükü he 9!

Ma ke ‘ano he kime, puka maila nä Koa ma ka helu ‘ekolu ma nä ‘ïä holo he 2,217 (Pae Kea, OIA). ‘O Kaläheo kai puka mai ma ka helu ‘ekahi o nä ‘ïä holo he 2,559. Inä na’e i komo ‘o Änuenue i ka ho’okükü me Kaimukï, inä paha ua puka mai läkou ma ka helu ‘ekahi. Akä, he nui nä ‘ina o ke kai!

A mahalo ho’i i nä Koa halihali pöpö ‘ë a’e. Mai luna a lalo, na La’akea Mano’i-Hyde i holo he 315 ‘ïä. Na Kamea Kahiapo he 299 ‘ïä, na Makamae Otani-Wengler he 177, na Mahuka Cullen he 99, na Kainoa Keli Nähaku he 29, na Käkela Lee he 15, na Makana Fernandez he 14, na Kealoha Smith he 10, na Pono Kahili he 8, na ‘maikalani Keama a me Hemakana Yam-Lum he 3, me Käpena Robinson he 1.

A he mahalo nui i nä keiki o ka laina külele näna i palaka a wehe a’e i nä ala mäla’ela’e e holo aku ai. ‘O ho’i ‘o Wilioho Ka’awa, Iokepa Waiwai’ole, La’amaikahiki Kamai, Kealoha Smith, Kaho’oipo Ancog-Mossman, Pono Vegas me ‘Ölino Kaleopa’a, pau pü me nä muku, ‘o ‘maikalani Keama a me Makana Fernandez. E ‘ole läkou, holo kikï ai ‘o Gante mä.

A mahalo ho’i iä Kamalei Ka’awa, Keapolani Palmeira Beamer, Kahöküwelo Kaleimamahu, me Kawa’a Kahana-Reid i komo pü aku i ka hahana o ka paio ‘ana. ‘A’ole e nele ko läkou pä’ani nui ‘ana i këia makahiki a’e!

He leo aloha a mahalo ho’i këia iä läkou päkahi a pau! A pëlä ho’i iä Ka’i Kealohamakua Wengler a me nä ka’i ‘ë a’e a pau!

Ha’aheo ko O’ahu me ko Hawai’i a puni iä läkou!

E ho’ouna ‘ia mai nä leka iä mäua, ‘o ia ho’i ‘o Laiana Wong a me Kekeha Solis ma ka pahu leka uila ma lalo nei:
» kwong@hawaii.edu
» rsolis@hawaii.edu
a i ‘ole ia, ma ke kelepona:
» 956-2627 (Laiana)
» 956-2624 (Kekeha)
This column is coordinated by the Hawaiian Language Department at the University of Hawai’i at Mänoa, supported by the Initiative for Achieving Native Hawaiian Academic Excellence.

Kualono

Ua ‘Ike Anei ‘Oukou?

Did You Know?

Download QuickTime 4 now! He mau ho‘olaha kēia i hana ‘ia e ka Hale Kuamo‘o me ke kāko‘o o ka ‘Aha Pūnana Leo. He mau waihona QuickTime kēia; inā ‘a‘ole i loa‘a ke QuickTime i kāu kamepuila, hiki ke ho‘oili ‘ia mai ke kahua pa‘a o ka Apple Computer. E kōmi ma luna o ke ki‘i ma ka ‘ākau.

Download QuickTime 4 now!These are radio announcements developed by the Hale Kuamo‘o with the assistance of the ‘Aha Punana Leo. They are in QuickTime format; if you do not already have QuickTime installed in your computer you can download it from Apple Computer. Just click on the graphic to the right.

E kōmi ma luna o ke ki‘iona Quicktime no ka ho‘olohe ‘ana i ka waihona e wehewehe ‘ia ma ke kikokikona.

Simply click on the Quicktime icon to listen to the file described in the text.

Quicktime GraphicMa ka pae‘āina ‘o Hawai‘i wale nō e ‘ōlelo ‘ia ai ka ‘ōlelo Hawai‘i.

Quicktime GraphicThere is no place else but Hawai’i where Hawaiian is spoken.

Quicktime GraphicAia ma kahi o ka ‘ehiku kaukani ‘elima haneli po‘e e a‘o ana i ka ‘ōlelo Hawai‘i i kēia manawa.

Quicktime Graphic There are approximately 7,500 people learning the Hawaiian language today.

Quicktime Graphic” ‘O ‘oe ka luāhi o kāu mele.”

Quicktime GraphicYou bear both the good and bad consequences of the poem that you write.

Ua ‘oi aku ka pākēneka o ka po‘e ‘ōlelo Hawai‘i i hiki ke heluhelu a kākau ma mua o nā lāhui ‘ē a‘e ma Hawai‘i ma ka ho‘omaka ‘ana o kēia kenekulia.

Quicktime GraphicAt the beginning of this century, Hawaiians had a literacy rate higher than any other ethnic group in Hawai’i.

Quicktime GraphicMa ka makahiki 1896, ua ho‘opau ‘ia ka ‘ōlelo Hawai‘i ma nā kula aupuni e ke aupuni Lepupalika ‘o Hawai‘i.

Quicktime GraphicIn 1896 Hawaiian was outlawed as a language of education by the Republic of Hawai’i.

Quicktime GraphicHe mau hua‘ōlelo Hawai‘i ‘oko‘a no ka mea ho‘okahi.

Quicktime GraphicThere different Hawaiian words for the same thing.

Quicktime Graphic‘A‘ole he 12 wale nō huapalapala o ka ‘ōlelo Hawai‘i.

Quicktime GraphicThere are more than 12 letters in the Hawaiian alphabet.

Quicktime GraphicUa ‘ike anei ‘oe i ka hana o ke kahakō?

Quicktime GraphicDo you know what the kahako (macron) does?

Quicktime GraphicUa ‘oi aku ka nui o ka hana ma ka ‘ōlelo Hawai‘i ma mua o ka nui o ka po‘e i hiki ke lawelawe i kēia mau hana.

Quicktime Graphic There is more work to be done in the Hawaiian language than there are people who qualified to do this work.

Quicktime Graphic‘O ke kula ‘o Lahainaluna ke kula ki‘eki‘e mua loa ma ka ‘ao‘ao komohana o ka muliwai ‘o Mississippi.

Quicktime Graphic Lahainaluna was the first high school west of the Mississippi.

‘O ka ‘ōlelo Hawai‘i ka ‘ōlelo ‘ōiwi ‘Amelika mua loa i loa‘a ka papa lawelawe ho‘olaha a me ke kahua pa‘a World Wide Web i mālama ‘ia ma kāna ‘ōlelo iho.

Quicktime GraphicHawaiian was the first indigenous language to have its own bulletin board service and World Wide Web server in its own language.

Quicktime Graphic‘A‘ole na nā mikioneli mua o Hawai‘i nei i ha‘i mua i ka ‘euanelio ma ka ‘ōlelo Hawai‘i.

Quicktime Graphic It was not the first missionaries in Hawai’i who first preached the gospel in Hawaiian.

Quicktime Graphic‘Oi aku ka nui o nā mo‘olelo Hawai‘i e pili ana i ka wā kahiko ma mua o nā mo‘olelo i kākau ‘ia no ‘Enelani, e like ho‘i me Beowulf.

Quicktime Graphic There are more written stories about old Hawai’ i than there are stories about old England, such as Beowulf.

Quicktime GraphicUa unuhi ‘ia kekahi mau mo‘olelo ‘ōlelo Pelekāne kaulana e like ho‘i me Ivanhoe, Moby Dick, and Charlotte’s Web ma ka ‘ōlelo Hawai‘i.

Quicktime GraphicMany famous books have been translated into Hawaiian, such as Ivanhoe, Moby Dick, and Charlotte’s Web.

Quicktime GraphicMa ka mokupuni ‘o Ni‘ihau wale nō i ‘ōlelo ‘ia ai ka ‘ōlelo Hawai‘i e ko laila po‘e a pau.

Quicktime GraphicNi’ihau is the only island where Hawaiian is spoken by all of its inhabitants.

Quicktime GraphicUa pa‘i ‘ia he kanalima a ‘oi nūpepa ‘ōlelo Hawai‘i i kēlā kenekulia i hala aku nei.

Quicktime GraphicMore than 50 different newspapers were printed in Hawaiian before the turn of the last century.

Quicktime GraphicUa ‘ike anei ‘oe i ka hana o ka ‘okina?

Quicktime GraphicDo you know what the ‘okina is for?

Quicktime Graphic‘O ka ‘ōlelo Hawai‘i, he ‘ōlelo kūhelu o Hawai‘i nei, ‘o ia pū me ka ‘ōlelo Pelekane

Quicktime GraphicHawaiian is an official language of the State of Hawai’i, along with English.

Quicktime GraphicUa ho‘omaka kekahi mau ‘ohana e ‘ōlelo Hawai‘i ma ka home.

Quicktime GraphicSome families have started to use Hawaiian as the language of the home.

Quicktime GraphicUa ho‘omaka kekahi mau hui pā‘oihana e ‘ōlelo Hawai‘i, a e ‘ae ‘ia ana nā pila kīko‘o i kākau ‘ia ma ka ‘ōlelo Hawai‘i e kekahi mau panakō.

Quicktime GraphicSome businesses have begun to use Hawaiian, and checks written in Hawaiian are being accepted by most banks.

Quicktime GraphicMa mua o ka loa‘a ‘ana o ka ‘ōlelo pa‘i ‘ai haole, ua loa‘a ka ‘ōlelo pa‘i ‘ai Hawai‘i.

Quicktime GraphicBefore there was Pidgin English, there was Pigin Hawaiian.

Quicktime GraphicUa ho‘okumu ka ‘Oihana Ho‘ona‘auao i papahana kula i a‘o ‘ia ma ka ‘ōlelo Hawai‘i.

The state Department of Education established a school program called the Papahana Kaiapuni Hawai’i where students are taught through the Hawaiian language.

Quicktime GraphicUa wehe ‘ia ka Pūnana Leo mua loa ma Kekaha, Kaua‘i ma ka makahiki 1984.

Quicktime GraphicThe first Punana Leo preschool was opened in Kekaha, Kaua’i in 1984.

Quicktime GraphicUa lō‘ihi nō ho‘i kekahi o nā mele kahiko, e like ho‘i me ke kumulipo.

Quicktime Graphic Some Hawaiian chants were very long, such as the kumulipo.

Quicktime GraphicHe ‘ōlelo Polenekia ka ‘ōlelo Hawai‘i, e like ho‘i ma ka ‘ōlelo Kāmoa, ka ‘ōlelo Tonga, a me ka ‘ōlelo Māori.

Quicktime GraphicHawaiian is a Polynesian language, like Samoan, Tongan, and Maori.

Quicktime GraphicUa ‘oko‘a ka puana ‘ia ‘ana o nā huapalapala H a me K ma waena o ka po‘e mānaleo.

Quicktime GraphicThe letters H and K are pronounced differently among native speakers.

Quicktime GraphicUa ‘oko‘a ka puana ‘ana i ka hua‘ōlelo Hawai‘i ho‘okahi nō, aia i ka ‘āina i ho‘opuka ‘ia ai.

Quicktime GraphicSome Hawaiian words may be pronounced differently in different areas.

Quicktime GraphicHe hana ma‘amau ma ke oli ka ho‘ololi ‘ana i ka puana ‘ana i nā hua‘olelo.

RealAudio GraphicThe pronunciation of words in chants are frequently changed.